"Сурхон"дан нега кетмоқчи бўлди? Жамоа ўйинини қандай қилиб кучайтирди? Клубнинг келажагидан нима учун хавотирда? Баҳром Ҳайдаровдан очиқ муносабат

“Сурхон” иккинчи даврада яхши старт олди. Бекободда “Металлург” мағлуб этилди, кейин “Андижон” устидан ғалаба қозонди. Сўнгра, Ўзбекистон Кубоги нимчорак финалда “Машъал” ҳам таслим этилди. “Сурхон” эса чорак финалга йўл олди. Кўриниб турибдики, бу жамоанинг ўйини ва натижалари яхши тарафга ўзгарди.

Бош мураббий Баҳром Ҳайдаров жамоа ўйинини йўлга қўя олган кўринади. Шу ўринда айнан мураббий масаласига эътиборингизни қаратмоқчимиз. Мавсумга Руфат Акрамхўжаев бошчилигида киришган жамоада кейинчалик мураббий ўзгарди. Акрамхўжаев истеъфога чиқди. Лекин унинг ўрнига айнан қайсидир мутахассис расман бош мураббий сифатида таништирилмаганди. Фақат Рустам Орипов билан Баҳром Ҳайдаров жамоани ўйинларга тайёрлаб бордилар. Кейин расман Ҳайдаров мустақил равишда ишга киришди.

- Бош мураббий Руфат Акрамхўжаев жамоадан кетган бўлса ҳам мен техник директор сифатида Рустам Орипов билан бирга машғулотларни олиб бордик, - дея ушбу масалага ойдинлик киритди, Ҳайдаров. - Барибир бош мураббий йўқ пайтда кимдир бу ишни бажариши керак эди. Чунки ўйинларга тайёргарлик кўриш талаб этиларди. Клуб раҳбарининг тавсиясига биноан жамоани бошқариб туришимизни айтди. “Сурхон”да ҳадеб бош мураббий алмашавериши ҳам раҳбариятга ёқмасди. Тўғрисини айтсам, биринчи давра охирлаб бораётган маҳалда жамоадан кетишни хоҳладим. Бу ҳақда раҳбариятга айтдим. Ўз навбатида улар ҳам бошқа мураббий қидираётгандилар. Шу боис суҳбатимиз очиқ-ойдин бўлди. Аммо кейин нима бўлди, билмайману, охир-оқибат раҳбарият менга ишонч билдирди. Ундай бўлса мени бош мураббий сифатида расман таништиришларини айтдим. Ёзги трансфер ойнаси пайтида бир қатор янги ўйинчилар олинди. Бу жараёнда мен ҳам қатнашдим. Бироқ қайсидир футболчини ўзим олиб келганим йўқ. Чунки кейинги тақдирим у пайтда мавҳум эди. Аммо янги футболчилар борасида маслаҳатлашиб турдик. “Машъал” билан учрашувдан кейин Тошкентда клуб раҳбари билан гаплашдик. Жамоани сизга топшираман деб ишонч билдирганидан кейин рози бўлдим. Шундан сўнг, масъулият янада кучайди. Ҳаммаси яхшиликка экан, мана иккинчи давра бошидан бош мураббий сифатида ишлаб келяпман. Бу билан иш жараёнимиз ўзгарди демайман, лекин омад ҳам биз томонда бўляпти.

Ёдингиздами, “Сурхон” биринчи даврада кўплаб очколарни йўқотди. Оқибатда клуб “Андижон” билан бирга аутсайдер мақомида бўлиб турганди. Аммо иккинчи даврани кетма-кет иккита ғалаба билан бошлаши эвазига “Сурхон” 11-ўринга кўтарилди. Жамоа қандай қилиб ўйинини яхшилай олди? Бунга бош мураббийнинг жавобини эшитинг:

- Энг биринчи сабаб рақобатни кучайтирдик. Қишда ўйинчи олишга имкониятимиз кам эди. Кўп футболчиларни шартномалари бор ва бошқалари пули бор жамоаларга кетаётгандилар. Бизда ҳам маблағ масаласи ёмон эмас. Лекин нимагадир ўша пайтда ўйинчи топишга қийналдик. Янги жамоа тузилди. Менга бироз осон бўлгани шуки, жамоанинг ўзаги бор. Ёзги трансфер пайтига келиб икки-учта чизиқни кучайтиришимиз керак эди. Бутунлай ўзгариш қилишга ҳожат йўқ эди. Фақат муаммоли позицияларни ёпсак ўйинимиз яхшиланиши кутилганди. Тахминимиз тўғри чиқди. Жавоҳир Соҳибов, Никита Павленко, Мурод Тўйчибоев каби ўйинчилар бизга катта фойда келтиряпти. Унгача ўринбосарлар таркибидаги ёшлардан фойдаланаётгандик. Мен ҳам футболчи сифатида ўйнаб юрган пайтимда агар рақобатчим кам бўлса, бўшашиб кетардим. Жамоамизда рақобатни кучайгани ўз-ўзидан ўйинимизни ҳам кучайтирди. Бироқ мураббийлар штаби томонидан қўлланилаётган услубимиз ўзгаргани йўқ. Жисмоний ёки тактик томондан тайёргарлик ишларимиз ўша-ўша. Фақат бизда футболчилар бўйича танлов кенгайди. Энди бизда асосий таркибда кимлар тўп суриши аниқ эмас. Танлов бўйича имкониятлар кенгайгани учун бошланғич таркибга кимларни тушириш борасида ўйланяпмиз. Бу мураббийнинг ишини қийинлаштиради, лекин ёқимли ҳолат. Иккита ўйинда ютиб ваҳима қилиш керак эмас. Ҳали ҳеч нимага эришганимиз йўқ. Қийин учрашувларимиз олдинда. Жамоамизнинг кучаётгани, ўсиб бораётгани кейинги ўйинларда – “Қўқон-1912”, “Локомотив”, “Сўғдиёна” каби рақиблар билан беллашувларда билинади.

Мураббий сифатида ўринбосарлар жамоасида ишлайманми ёки асосий жамоадами, фақат олдимга максимал вазифаларни қўяман. Нимани истаётганимни ва ўйин услубимизни йигитларга сингдиришга ҳаракат қиламан. Бизда тажрибасиз ўйинчилар кўп. Чунки юқори босим остидаги қийин ўйинларда кам қатнашишган. Муҳитдан сезяпманки, ғалабалар орқали футболчиларимизда ўзларига бўлган ишонч ошяпти.

Ҳар қандай ғалаба жамоага яхши кайфият бағишлаб, футболчиларнинг ишончини оширади. Лекин бир-иккита ғалаба билан муаммолар камайиб қолмайди. Биламизки, “Сурхон”да ҳали қилинадиган ишлар кўп. Айниқса, маҳаллий ёшларни тарбиялаш, жамоанинг ўринбосарлар таркибини шакллантириш каби ишлар бўйича оқсаётгани бор гап. Баҳром Ҳайдаровдан “Сурхон”нинг келажагини қандай кўряпсиз, дея сўраганимизда шундай жавоб қайтарди.

- Жамоа келажаги бўлиши учун ҳар йили таркибни алмаштиравермасдан ўринбосарлар таркибига ҳам аҳамият бериш керак. Бу борада ҳали шароит етарли эмас. Афсуски, ёшлар жамоамизни базаси йўқ. “Сурхон” жамоаси ҳам Термизда ўз базасига эга эмас. Ўринбосарлар жамоаси билан мустаҳкам алоқа бўлишида қийинчиликлар юз беряпти. Бундай паллада иқтидорли ўйинчиларни йўқотишимиз мумкин. Бошқа клубларга кетиб қолишлари ҳеч гап эмас. Шу боис ёшлар жамоасининг ҳам моддий-техник базасини йўлга қўйиш муҳим. Майли, бу йилги мавсумни ниятимизга яраша юқори ўринлардан бирида якунлаб олармиз. Лекин келажакни ўйласак ҳамда барқарорликнинг давомийлигини истасак, “Сурхон”да мен бош мураббий бўламанми ёки бошқасими, клуб учун биринчи ўринда пойдевор қўйилган бўлиши лозим. Бунинг учун ёшлар жамоаларига эътибор кучайтирилиши лозим. Яъни, тизим яхши ишлаши керак. Раҳбарият “Сурхон”нинг етакчи жамоалардан бирига айланишини хоҳлашса, пойдевор мустаҳкам бўлиши муҳим.