"Таклифлар йўқ эмас, қачонки, шартномани узайтирмасак кейингина бошқалар билан гаплашаман" - "Насаф" етакчиси!

“Насаф” клубининг бу йил қайд этган натижаларидан энди хабардорсиз. Жамоа ўзи учун орзу ҳисобланган чемпионликка жуда яқин келганди.

Барчаси ўз қўлида турганди. Бироқ охирига келганда “Аждарлар” “қовун” тушириб қўйди. Оқибатда 3-ўринга тушиб кетди.

Шундай бўлса-да, “Насаф” мамлакат Кубогини қўлга киритди ва яна ўз ҳисобига битта бронзони ҳам қўшиб қўйди. Жамоа сардори Умар Эшмуродов чемпионат таассуротлари бўйича Sports.uz журналистининг саволларига жавоб қайтарди.

- “Насаф” бу йил бронзани қўлга киритди, Кубок соҳибига айланди ва ОЧЛда гуруҳдан чиқди. Айтинг-чи, жамоа сардори сифатида ушбу мавсум кўпроқ нимаси ёдда қоларли бўлди ва қандай таасссурот қолдирди?

- Мавсумни биз учун яхши ўтди, деб ҳисоблаймиз. Тўғри, олдимизга қўйилган мақсадимизга тўлиқ эриша олганимиз йўқ. Лекин Ўзбекистон Кубогини қўлга киритишга муваффақ бўлдик. Осиё Чемпионлар лигасидаги иштирокимизни ҳам давом эттираётганимиз қувонарли. Шахсан мен учун жорий мавсумда биринчи марта ОЧЛнинг гуруҳ босқичидан муваффақиятли чиқа олганимиз билан ёдда қолди.

- Шунингдек, “Насаф”да чемпионлик учун ҳам жуда яхши имконият бор эди ва барчаси клубнинг ўз қўлида турганди. Бироқ охирги иккита баҳсда аламли мағлубиятга учради. Очиғи, бундай имконият қўлдан бой берилишини кўпчилик кутмаганди. Ўзи, нима бўлганди?

- Албатта, биз чемпионликни ҳаммадан ҳам кўра кўпроқ хоҳлагандик. Ўйлашимча, ўз майдонимизда “Нефтчи”га қарши учрашувда жуда шошиб ўйнадик. Бизга фақат ғалаба зарур эди. Шунинг учун асосан ҳужум қилишни ва гол уришни ўйладик. Афсуски, натижада охирига бориб жазоландик. Охирги турга келиб деярли барчаси ҳал бўлиб қолганди. “Пахтакор” бу имкониятни қўлдан чиқармаслигини билардим. Гарчи “Олимпик” билан учрашувда йигитлар билан ҳаракат қилган бўлсак-да, унчалик иштиёқ кўрмадим.  

-  Сиз учун чемпионатдаги энг оғир учрашув қайси бўлди?

- Бирортасини ажратмайман. Мавсумдаги ҳамма учрашув биз учун қийин ўтди.

- Янги мавсум учун режангиз қандай? Шартномангиз тугаяпти-а? Жамоадаги фаолиятингизни давом эттирасизми?

- Келаси йили олдимиздаги вазифалар янада жиддий. Икки марта Осиё Чемпионлар лигасида ўйнаймиз. Чемпионат ва Кубок баҳслари ҳам бор. Режаларимиз ўша-ўша. Барча мусобақаларда охиригача курашамиз.

-  Эшитишимча, сизга яна таклифлар бўлаётган экан. Бу қанчалик рост?

- Албатта, таклифлар бор, йўқ эмас, Худога шукр. Қачонки, “Насаф” билан шартномамни узайтирмасак кейингина бошқалар билан гаплашишни бошлайман. Бу катта эҳтимол билан январь ойида ҳал бўлади. 

- Бу йил “Навбаҳор” футболчиси Жамшид Искандеров Ўзбекистоннинг энг яхши футболчиси деб топилди. Бу номинацияда жамоадошингиз Хусниддин Алиқулов ҳам бор эди. Энг муносиби совринни олди, деб ўйлайсизми?

- Бунга унчалик эътибор берганим йўқ. Кимга соврин беришган бўлса, демак, ўша футболчи ҳақли. Номинациядаги барча ўйинчилар яхши савияли.

- Шунингдек, “Насаф”ни бир қатор футболчиларига “Пахтакор”дан таклиф бўлаётгани ҳақида эшитяпмиз. Уларни пойтахтга кетиши ўшалар учун олдинга ташланган қадам бўладими? Масалан, сиз ҳам у ерга бориб қайтиб келгандингиз. Бу борада муносабатингиз?

- Ким қаерда футбол ўйнашини ва қаерда яшашини ўзлари ҳал қилишади. Пасайиш бўладими ёки кўтарилишми, бу ўша ўйинчининг ўзига боғлиқ. Қаерга бормасин, борган жойида ҳам ўз устида тинмай ишласа, ҳаммаси яхши бўлади.

Шуҳратбек Жўраев.