Танқиднинг ёмони: Мбаппе машғулотлар юлдузига айланиб қолди

Испания чемпионатининг навбатдаги турида “Реал” Бильбаода “Атлетик”дан 1:2 ҳисобида мағлубиятга учради.

Учрашувнинг кульминацион нуқтаси мадридликларнинг янги юлдузи Килиан Мбаппе пенальтидан гол уролмаган вазият бўлди.

Гарчи баҳсдан кейин франциялик футболчи барча айбни ўз бўйнига олган бўлса-да, унга босим янада кучайди. “Реал” 25 ёшли ҳужумчини ҳар томонлама ҳимоя қилаётганига қарамай, аламли мағлубиятдан кейин босимдан қутилиб бўлмаяпти.

Relevo нашрининг ёзишича, “Реал” футболчилари Килиан Мбаппенинг иқтидори ва машғулотларда кўрсатаётган даражасидан ҳайратга тушмоқда. Бироқ, ўйин бошланиши билан Мбаппенинг ичидаги “ўти” тез ўчиб қоляпти.

Манбага кўра, мадридлик чарм тўп усталари орасида ҳам Килиан Мбаппенинг жамоада ўйнаб кета олишига шубҳа билан қарайдиганлар пайдо бўла бошлади.

Илгари Эден Азарда шундай бўлганди. “Челси”да ўйнаган кезлари Англия Премьер-лигасининг энг зўр ҳужумкор футболчиси бўлган бельгиялик юлдуз Мадридда ҳеч нарсага эришолмай, фаолиятини якунлашига тўғри келган.