Темур Кападзе: "Футболчиларим бундан ҳам яхши ўйнай олишади, буни биламан"

“Олимпик” – “Андижон” (0:1) учрашувидан кейинги матбуот анжуманининг иккинчи қисмида мезбонлар бош мураббийи Тимур Кападзе иштирок этди.

- Тимур ака, аввало учрашув ҳақида тўхталиб ўтсангиз.

- Биринчи навбатда “Андижон” жамоасини ғалаба билан табриклайман. Учрашув бошида стандарт вазиятдан гол ўтказганимиз ўз таъсирини ўтказди. “Андижон” шундан кейин деярли ҳимояга урғу берди. Бу ҳимояни ёриб ўтишда қаердадир маҳорат етишмади. Ўйлайманки, барибир фойдали ўйин бўлди. Зич ҳимояни ёриб ўтишга ҳаракат қилдик. Қандайдир имкониятлар бор эди. “Андижон” яхши ҳимояланди ва бизга деярли имкон бермади.

- Рамазон ойи сабабли учрашувларни 17:00 га белгиланаётганига муносабатингиз қандай?

- Албатта, хоҳлайсизми-йўқми, таъсирини ўтказади. Қорин очган, сувсиз ўйнаш...Биринчидан, жисмоний юклама оғир. Организм “нагрузка” оляпти ва соғлиққа бу қанақадир таъсир қилади. Рўзадор одамни қандай ҳолатда бўлиши ва ўзини қанақа ҳис қилишини биламиз. Кечроқ бўлса янада яхши. Агар имкониятимиз бўлганида кечки 9 да ўйнасак...Марокашда бўлганимизда ўйинлар 21:30 да бошланди. Рўзани очиб, 3 соатдан кейин ўйин бошланарди. Ҳеч қанақа қийинчилик сезилмасди. Афсуски, бизда бу масалада имконият йўқ. Машғулот жараёнларимизни ҳам кечроқ ўтказа олмаяпмиз. Лекин прожекторларимиз бор ва нисбатан учрашувларни кечроқ ўтказсак бўлади. Бугун учрашув давомида иккала жамоа ҳам бир хил ҳолатда эди.

- “Олимпик” кейинги учрашувларни “Турон” ва “Бухоро”га қарши ўтказади. Бу йил Суперлигага қайтган клубларга қарши “Олимпик” сўнгги иккита учрашувда йўқотган очколарини қайтариб оладими?

- Биз учун асосийси, йигитлар қандай ҳаракат қилаётганидир. Тўғри, аҳамият берсак, кўп жамоалар осон ўйин ўйнашяпти. Кўпроқ куч ва узатмалар орқали ҳаракат қилишяпти. Биз ҳам шунақа футбол ўйнасак бўлади. Лекин очилиб, чиройли, комбинацияга бой ўйин кўрсатишларини истаяпман ва шу томонга урғу қаратяпмиз. Натижа келади, мен бунга аминман. Жамоамиз ҳеч кимдан кучсиз эмас. Биз бошқа вазифанинг йўлидамиз. Футболчилар ривожланишлари керак. Бундай ҳимоявий ўйинга эртага бошқа клубга қарши ҳам дуч келамиз. Учрашувдан керакли хулосани чиқарамиз. Футболчилар янада яхшироқ ўйнайдилар. Биласизлар, бизда қизил карточка олган бир нечта футболчиларимиз бор. 5 нафар ўйинчимиз ёрдам бера олмаяпти. Улар асосий футболчиларимиз. Иккинчи бўлимда айниқса билиняпти. Тажрибалироқ ва индивидуал жиҳатдан кучлироқ ўйинчиларимиз тушишганида янада фойдалироқ бўларди. Ўйлайманки, кейинги баҳсларда ҳаммаси қайтади.

- Кўпинча хатоларни ўйинчиларни ёшлиги билан изоҳлайсиз. Улар қачон катта бўлишади?

- Тажриба йиллар давомида келади. У бир кунда бўлиб қолмайди. Менман, маҳорати кўп бўлган жамоа ҳам ёриб ўтишда қийналади. Булар 20,21, 22 ёшдаги йигитлар, ривожланишяпти. Бу каби учрашувларни ўтган йили кўришди. Рақиблар ҳам осон жамоалар эмас. Улар ҳам тайёргарлик кўришяпти. Чунки олдиларида ўз вазифалари бор. Ҳар бир жамоани яхши футболчилари бор. Сизлар фақат бизни клубга қараманглар, бошқалар ҳам осон таслим бўлмаяпти. Албатта, кучли бўлишимиз керак ва яна ниманидир устида ишлашимиз лозим. Ўйиндан-ўйинга ҳолатимизни яхшилаймиз. Мағлубиятдан тўғри хулоса чиқарамиз. Футболчиларим бундан ҳам яхши ўйнай олишади, буни биламан. Барчасини вақт кўрсатади.

“Андижон” матбуот хизмати.