Теннисчимиз Туркияда бош совринни кўзламоқда

Туркиянинг Анталия шаҳрида Халқаро теннис федерацияси мусобақалари тақвимидан жой олган “M15” таснифига кирувчи турнирда мамлакатимизнинг иккинчи рақамли теннисчиси Сергей Фомин ярим финалга йўл олди.

Сергей Фомин нуфузли мусобақанинг жуфтлик баҳслари чорак финалида нейтрал теннисчи Даниил Голубев билан тандемда италиялик Кристиан Кампес ва Мариано Таммаро дуэтини 3:6, 6:1, 10:8 ҳисобида таслим қилди.

Шу тариқа, 1/2 финал босқичига чиққан Сергей ва Даниил Голубев финал йўлланмаси учун ўтадиган ўйинда нейтрал теннисчи Тимофей Дерепаско ва франциялик Томас Фаурел – испаниялик Диего Санчез ҳамда Алехандро Пертуса жуфтликлари ўртасида баҳс ғолиби билан рақобатлашади.

Эслатиб ўтамиз, теннисчимиз яккалик баҳсларида иккинчи даврага қадар етиб борди ва кутилмаганда руминиялик Стефан Адриан Андрескуга имкониятни бой бериб қўйди.