Tennischimiz Turkiyadan ikkinchi sovrinni olib ketmoqchi

Turkiyaning Antaliya shahrida M25 tasnifiga kiruvchi xalqaro tennis turnirida hamyurtimiz Sergey Fomin yakkalik bahslarini g‘alaba bilan boshladi.

Tennischimiz musobaqaning birinchi davrasida germaniyalik Tom Gench bilan raqobatlashdi. Uchrashuvning birinchi setida bor yo‘g‘i 3 ta geymni boy bergan Sergey, ikkinchi setda raqibiga hech qanday imkoniyat qoldirmadi. Shu tariqa, ikkinchi davraga yo‘l olgan S.Fomin chorak final yo‘llanmasi uchun frantsiyalik Shon Kuenin bilan kuch sinashadigan bo‘ldi.

Shuningdek, Sergey Fomin turnirning juftlik bahslarida neytral tennischi Pavel Verbin bilan tandemda chexiyalik Zdenek Kolar va avstriyalik Sandro Kopp juftligi bilan bahs olib boradi.

Eslatib o‘tamiz, mamlakatimizning ikkinchi raqamli tennischisi bo‘lgan Sergey Fomin o‘tgan haftada Antaliyada o‘tkazilgan nufuzli musobaqada bosh sovrinni qo‘lga kiritgan edi.