Терма жамоамизнинг 19 ёшли етакчисини Европада кутишяпти. Футболчимиз таклифлар ҳақида нима дейди?

Ўзбекистон U-20 терма жамоа сардори ҳамда “Бунёдкор” клуби аъзоси Умарали Раҳмоналиев охирги пайтларда жуда тез тилга олиняпти. 18 август куни 19 ёшни қаршилайдиган ажойиб иқтидор эгаси қисқа фурсат ичида мутахассисларнинг эътиборини тортяпти.

Футболчи биринчи даврада “Бунёдкор” сафида 10 та учрашувда майдонга тушди ва рақиблар дарвозасини 5 бор ишғол этди. У гол урган ўйинларда “Бунёдкор” мутлақо ютқазмаган. Аниқроғи, Раҳмоналиевнинг голларидан сўнг жамоасида 4 та ғалаба ва 1 дуранг қайд этилган.

Шунингдек, жамоасининг ҳужумларида ҳам жуда фаол. Майдонда унинг фойдали иш коэффициенти жуда юқори. Умарали Ўзбекистон U-20 терма жамоасида ҳам етакчилардан бирига айланиб олган. Бош мураббий Равшан Ҳайдаров бу футболчидан максимал фойдаланишга ҳаракат қилмоқда. Ҳозирда бу футболчига четдан яхши таклифлар тушяпти. Шу сабабли ўйинчи тез орада бир қарорга келиши керак.

умар2

Кеча Ўзбекистон U-20 терма жамоаси Чиғатойда “Андижон”га қарши назорат учрашувини ўтказди. Унда Умарали сардорлик боғичи остида майдонга тушди ва ўзидан ажойиб таассурот қолдирди. Учрашувдан сўнг Раҳмоналиев Sports.uz мухбирининг бир қатор саволларига жавоб берди.

- Ўртоқлик ўйини сизга ёқдими?

- Бугунги ўйинга келсак, “Андижон”га қарши майдонга тушдик. Бу рақиб про лиганинг етакчиларидан бири ва яхши жамоа. Шунинг учун кучли ўйин бўлиши аниқ эди. Биз ҳозир ўқув-машғулот йиғинидамиз. Асосан “CAFA” мусобақасига тайёрланяпмиз. Қолаверса, олдимизда турган Осиё чемпионати саралаш баҳсларига ҳам ҳозирлик кўриб боряпмиз. “Андижон”дек жамоага қарши ўйин ўтказиш биз учун яхши синов ҳисобланади. Кўрганингиздек, учрашув ҳужумкор ва жанговар руҳда ўтди. “Андижон”нинг ҳам чемпионатга яхши тайёргарлик кўрганлиги сезилиб турибди. Бу жамоанинг кейинги ўйинларига омад тилаб қоламан.

умар3

- Терма жамоа ҳам яхши шаклланаётгани кўриняпти. Шунингдек, Жанубий Америкада кучли рақибларга қарши ўйинлар ўтказилади...

- Лотин Америкасидаги учрашувларда ҳам жамоавий ўйинни шакллантириб бормоқчимиз. Олдимизда вазифалар кўп. Осиё ва жаҳон чемпионатларига муносиб тайёрланишимиз керак. Шунинг учун жамоамиз янада жипслашиб, ўз ўйинларимиз билан ёрқин таассурот қолдириб, Ўзбекистон шарафини муносиб ҳимоя қилиш бизнинг вазифамиз. Ўзбекистон даражасини бутун дунёга танитмоқчимиз.

- “Бунёдкор” клубидаги тақдирингиз тўғрисида ҳам сўрамоқчиман. Боиси, сизга четдан таклифлар бўлаётганди. Ҳозирда бу борада ишлар қандай кетмоқда?

- Албатта, чет эл клубларидан таклифлар чиқяпти. Ҳозир музокаралар олиб бориляпти. Ҳали уларда трансфер ойнаси ёпилгани йўқ. Насиб қилса, аниқлик киритилади ва бу ҳақида “Бунёдкор” батафсил маълумот беради.

умар1

- Таклифлар Европаданми?

- Ҳа, Европадан.

- Айнан қайси клублар?

- Буни айтолмайман, сир бўла қолсин.

- Легионерликка тайёрмисиз?

- Тайёрман деб ўйлайман. Балки ҳозир бироз вақтли бўлиши мумкин. Лекин тўхтамасдан ишлашда ҳаракат қиладиган бўлсак, ҳамма нарсани иложиси бор, деб ўйлайман.

 

Фикрлар

Фикр қолдириш учун авторизациядан ўтинг!
Эли Анорбоев
29/07/2022 16:53
яша
&
Bek 56
29/07/2022 13:44
Балли УмарАли ишларингга ривож