Термага чақириб, мени безовта қилманг!

Англия терма жамоаси бош мураббийи вазифасини бажараётган Ли Карсли “Арсенал” ҳимоячиси Бен Уайт хизматидан фойдаланмаётгани сабабини айтди. 

26 ёшли Уайт 2022 йилги жаҳон чемпионати вақтида Англия терма жамоасини муддатидан олдин тарк этганидан бери ҳали жойига қайтгани йўқ. 
Маълумотларга қараганда, Бен Уайт ўша пайтдаги бош мураббий Гарет Саутгейтнинг ёрдамчиси Стив Холланд билан уришиб қолган. Европа чемпионатидан кейин ҳар икки мураббий ишдан кетди. Аммо ҳимоячи ҳамон термага қайтгани йўқ. Янги мураббий эса, Уайтнинг фикрини ўзгартиришга уринмаслигини билдирди. 

- Октябрь ойидаги йиғинлар олдидан Бен Уайт билан гаплашиб кўраманми? Йўқ, гаплашмайман. Бунақа ниятим йўқ. Бу масалани яқинда бўлган ўйинлар қайдномаси тузилганда муҳокама қилгандик. 

Ҳар бир ўйинчи Англия терма жамоасида ўйнашга ҳақли. Билишимча, Бен Уайт уни безовта қилмаслигимизни сўраган. Агар бу борада фикри ўзгарса, демак инобатга оламиз. 

Биз учун майдоннинг ҳар бир нуқтасида рақобат бўлиши муҳим. Ўйинчи қанча кўп бўлса, танлов имконияти ҳам кенг бўлади, - деди Ли Карсли.