Файзуллаев бразилияликларнинг “жаҳли”ни чиқарди!

Ўзбекистон миллий терма жамоасининг 2026 йили АҚШ, Мексика ва Канада майдонларида бўладиган жаҳон чемпионатига чиқишига катта ҳисса қўшган Аббосбек Файзуллаев қисқа таътилдан кейин ЦСКА сафига қўшилиб, янги мавсумга тайёргарликни давом эттирмоқда.

Москва клубида бош мураббий алмашгани боис, “армиячилар”нинг барча ўйинчилари қаторида 21 ёшли легионеримиз ҳам янги устози Фабио Челестинига ўз имкониятлари ва салоҳиятини қайта намойиш қилишига тўғри келади.

ЦСКА клуби матбуот хизмати ижтимоий тармоқлардаги расмий саҳифалари орқали ўқув-машғулот йиғини жараёнидан видеолавҳаларни эълон қилди. Унда Аббосбек Файзуллаев дастлабки тайёргарлик машғулоти қандай ўтаётгани ва жамоадаги ички муҳит ҳақида гапирди.

- Муҳит ҳар доимгидек яхши. Йигитларнинг юзида табассум ва улар бир бири билан ҳазил-ҳузул қилишяпти. Биз ҳозир бразилияликлар билан ҳазиллашдик. Биз ҳам, улар ҳам навбатдаги жаҳон чемпионатига чиқдик. Бир биримизга қарши ўйнаш ҳақида гаплашдик. Мен уларга “Ўзбекистон ютади”, дедим. Улар эса, “Йўқ. Бразилия 5:0 ҳисобида ютади”,  дейишяпти, - деди Аббосбек Файзуллаев.

Таъкидлаш жоизки, ЦСКА сафида ўнта хорижий мамлакатдан жами 14 нафар легионер рўйхатдан ўтказилган. Улардан энг кўпи, яъни тўрт нафари бразилиялик ўйинчилардир.

Улар орасида энг тажрибали икки ҳимоячидан бири – 30 ёшли Мойзес 2023 йилдан бери “армиячилар” шарафини ҳимоя қилиб келмоқда. У фаолияти давомида “Коринтианс”, “Баия”, “Ботафого” ҳамда  “Интернасьонал” сингари Бразилиянинг энг машҳур клубларида тўп тепган.

Яна бир 30 ёшли ҳимоячи Виллиан Роша эса, Москвага 2022 йили келган. Бу футболчи Россия Премьер-лигасига қўшилишдан аввал Бразилия ва Португалия чемпионатларида тажриба тўплаган.

ЦСКАга Аббос Файзуллаев билан бир пайтда келган 24 ёшли Келлвен “Атлетико Паранаэнсе” клубидан олиб келинган эди. Бу футболчи Бразилия U-23 терма жамоасида еттита учрашувда иштирок этган.

2025 йилнинг февраль ойида ЦСКА трансфер қилган Алеррандро  Россия Премьер лигасида ўзини кўрсата олгани йўқ. “Армиячилар” сафида ярим мавсум давомида етти маротаба майдонга тушган 25 ёшли марказий ҳужумчи ҳали бирорта самарали ҳаракатни амалга оширгани йўқ.

Кўриниб турибдики, ЦСКАдаги бразилияликларнинг ҳеч бири ўз мамлакатлари бош жамоаси аъзоси ҳисобланмайди.

Аббосбек Файзуллаев “Пахтакор”дан ЦСКАга 2023 йилнинг августида кўчиб ўтган эди. Шундан бери “армиячилар” сафида барча турнирларда 71 та учрашувда қатнашган легионеримиз ўз ҳисобига саккизта гол ва 22 та ассист расмийлаштирган.

21 ёшли ҳужумкор футболчимиз икки йилдан бери Ўзбекистон миллий терма жамоаси аъзоси ҳисобаланади. У ҳозиргача халқаро миқёсда 27 та ўйин ўтказиб, рақиблар дарвозасини саккиз маротаба ишғол қилган.

Тезкор: Шомуродов қайси жамоани танлади?

Гвардиолага айнан Ҳусанов етишмади!

“Сити” Ҳусановнинг шериги билан музокара бошлади

Ҳусанов, Холандни табриклаб қўй!

Янги мураббий Файзуллаевга қандай баҳо берди?

Ҳусанов кўз ўнгида “Манчестер Сити” тарихий рекорд ўрнатди

Легионеримиз Европада юриш қилишга тайёр!