Тилемансдан Халиловичгача. Ёхуд Чемпионлар лигасида майдонга тушган энг ёш футболчилар "ТОП-5"

Юссуфа Мукоко (20.11.2004) 16 ёш 18 кун

"Зенит" – "Боруссия" (Дортмунд) (1:2)

8 декабрь 2020 йил

Чемпионлар лигаси тарихида майдонга тушган энг ёш футболчи рекорди мусобақанинг жорий мавсумида янгиланди. Мукоконинг тарихи рекордлар ҳақида сўзлайди. Этник камерунлик ҳисобланган ушбу футболчи Чемпионлар лигаси, УЕФА Ёшлар лигаси ва Бундеслигада майдонга тушган энг ёш футболчи ҳисобланади. У нафақат Германия чемпионатида, балки Европанинг "ТОП-5" чемпионатларида гол урган энг ёш ўйинчи сифатида ҳам тарихга кирди. Эрлинг Холанд бу жамоадошини дунёдаги энг истеъдодли футболчилардан бири, деб ҳисоблайди. Чиндан ҳам Мукоко янги юлдузга айлана оладими? Кўрамиз. Чунки футболда ёшлардан катталар даражасига ўтиш осон кечмаслигига мисоллар етарлича. Бошқа томондан, барчани синдириб ташлаган ўспиринлар борасида ҳам мисоллари жуда кўп!

Селестин Бабаяро (29.08.1978) 16 ёш 87 кун

"Андерлехт" – "Стяуа" (1:1)

23 ноябрь 1994 йил

Бу бизнинг кучли бешлигимизда ўтган асрда амалга оширилган ягона рекорд ҳисобланади. Бу воқеа анча олдин содир бўлган, у пайтда қолган 4 та рекордчи ҳатто дунёга ҳам келмаган эди. Ўшанда у қанчалик  шов-шув бўлганини тасаввур қилаверинг. Нигериялик футболчи Бельгия ва Англия чемпионатларида бир қатор совринларни қўлга киритди. Бундан ташқари, “Челси” билан бирга УЕФА Кубоги ва Суперкубогида зафар қучди. Бабаяро Окоча, Кану ва Бабангида билан бирга 1996 йил Атлантада бўлиб ўтган Олимпия ўйинларида чемпиони бўлганини кўпчилик яхши эсласа керак.

Райан Шерки (17.08.2003) 16 ёш 102 кун

"Зенит" – "Лион" (2:0)

27 ноябрь 2019 йил

Келиб чиқиши жазоирлик бўлган француз футболчиси "Лион" тарбияланувчиси ҳисобланади. У “Лион”нинг ёшлар жамоасида ҳам бир неча мавсум тўп сурган ва ҳозирда асосий таркибга мустаҳкам жойлашиб олиш учун ҳаракат қилмоқда. Шерки болалигиданоқ рекордларни бирин-кетин ўз ҳисобига ёздириб қўя бошлади. Табиийки, шундан сўнг у Европанинг кучли клублари скаутлари эътиборига тушди. Матбуот ҳалигача Шеркини гранд клубларга ўтиши мумкинлиги ҳақида ёзишдан тўхтамаяпти. Бироқ Райан учун бу ёшдаги бош мақсад "Лион"нинг асосий таркибига қатъий ўрнашиб олишдир. Шерки 2019 йилда “Зенит”га қарши бўлиб ўтган УЕФА Чемпионлар лигаси учрашувида захирадан майдонга туширилди ва 15 дақиқа ҳаракат қилди. Бу унга рекордчилар қаторига кириши учун етарли бўлди.

Ален Халилович (18.06.1996) 16 ёш 128 кун

"Динамо" (Загреб) – ПСЖ (0:2)

24 октябрь 2012 йил

Загребнинг "Динамо" клуби бош мураббийи Анте Чачич ПСЖга қарши ўйинда ҳакам томонидан қўшиб берилган дақиқаларда ёш футболчиларни ўзаро алмаштирди. Аниқроғи, 18 ёшли Матео Ковачич ўрнига 16 ёшли Ален Халилович майдонга тушди. Ўйиндан сўнг, оммавий ахборот воситаларида ёш хорватнинг Златан Ибрагимовичга қараши мемга айланди ва жуда кенг тарқалди. Кўп ўтмай, Халилович Европа футболининг энг буюк истеъдодларидан бири, деб топилди ва у билан "Барселона" шартнома имзолади. Бироқ, Ален бирдан “йўқолиб қолди”. У Каталония жамоасида узоқ қолмади, шундан кейин яна олтита жамоада ўйнади. Халилович ҳозир 24 ёшда ва Англиянинг иккинчи дивизиони - Чемпионшипда ўйнайдиган “Бирмингем” футболчиси ҳисобланади.

Юри Тилеманс (07.05.1997) 16 ёш 148 кун

"Андерлехт" – "Олимпиакос" (0:3)

2 октябрь 2013 йил

Бизнинг бешликдаги яна бир "Андерлехт" вакили бу Юри Тилемансдир. Бельгиялик футболчи шу куни рекордчи сифатида майдонга тушган бўлсада, учрашувда хет-трик қайд этган Костас Митроглунинг соясида қолиб кетди. Аммо у юқорида санаб ўтган айрим ёш футболчилардан фарқли равишда ўзига билдирилган юксак ишончни оқлай олди. Тилеманс “Андерлехт” тарихидаги энг ёш сардор бўлди ва кейин “Монако”га ўтди. Франция чемпионатида ўзини яхши намойиш этгач, уни “Лестер”га олиб кетишди. Юри ҳозирда Брендан Рожерс жамоасининг энг муҳим ўйинчиларидан бири ҳисобланади. Шундай экан, унинг ютуқлари ҳали олдинда. Кўрамиз, Тилеманс келажакда яна қандай рекордлар соҳибига айланар экан.