Тимур Ибрагимов: Майк Тайсоннинг телешоуларида иштирок этганман

- Одатда, спортчилар фаолиятини якунлаганидан сўнг, мураббийлик қила бошлашади. Лекин сизни бу борадаги фаолиятингиз ҳақида ҳам маълумот йўқ. Ҳозирда нима билан машғулсиз?

- Асосан, бизнес билан шуғулланмоқдаман. Тўғри, доимий тарзда мураббийлик фаолиятимни олиб бораётганим йўқ. Лекин баъзида ёшларга устозлик ҳам қилиб тураман.

- Умуман олганда ҳаваскорда ҳам профессионал боксда ҳам муваффақиятли фаолият олиб бордингиз. Ўзингиз қайси биридаги натижаларингиздан қониқиш хосил қилгансиз?

- Ўйлайманки, бу саволга муҳлислар жавоб бергани мақул. Қайси биридаги натижаларимиз  мухлисларни мамнун этган бўлса, демак биз учун ҳам ўшаниси мухим (кулади).

- Ҳаваскор боксда турли хил турнирларда иштирок этдингиз. Лекин спортчининг барибир энг эсда қоларли мусобақаси бўлса керак. Сиз бу борада қайси турнирни ёдга олган бўлардингиз?

- Барчасини кечагидек эслайман. Бироқ, ҳаваскор бокс бўйича АҚШда бўлиб ўтган Олимпиада ўйинларига тайёргарлик алоҳида эсимда қолганди. Батафсил тўхталиб ўтмайман. Бир сўз билан барчаси мен учун идеал тарзда бўлиб ўтганини айта оламан холос.

- Адашмасам, -81 ва -91 кг вазн тоифасида ринга чиққансиз. Машғулотларда, Руслан Чагаев, Рустам Саидов, Сергей Михайловлар билан спарринг ишлаган бўлсангиз керак. Уларнинг кучли жихати нимада эди?

- Ҳа, 81 ва 91 кг вазн тоифаларида ҳаракат қилганман. Санаб ўтганларингизни барчаси билан биргаликда ўқув-машғулот йиғинларида бирга бўлганмиз. Мусобақаларда иштирок этганмиз. Яқин дўстлар эдик. Албатта, улар билан кўплаб спаррингларда бирга ишлаганмиз. Нима ҳам дердим, уларнинг натижасига қарасангиз барчаси аён бўлади. Жаҳон даражасидаги жуда кучли йигитлар эди.

- Профессионал боксга ўтишингиз ва умуман промоушен, промоутер, контрактлар тўғрисида маълумот бера оласизми?

- Сизга шуни айта оламанки, профи боксга пул ишлаш учун ўтганман. Мусобақаларда проумотер кўриб колган ва шартнома имзолаганмиз.

- Майк Тайсон, Султан Ибрагимовлар билан битта залда шуғуллангансиз. Улар билан ҳам  машғулотлар жараёнида бевосита тўқнаш келган бўлсангиз керак?

- Дарҳақиқат, 2004 йил АҚШ да Майк Тайсон билан спарринг шерик сифатида ишлаганмиз. Бокс қиролларидан бири билан учрашиш, у билан машғулотларда ишлаш чексиз завқ бағишлаган. Ўз ўрнида ундан кўп нарса ўрганганман. Бир ой мобайнида Аризонада ўқув-машғулот йиғинларида бирга бўлганмиз. Қолаверса, у билан боғлиқ телешоуларда ҳам иштирок этганман. Султон яқин дўстларимдан бири сналади. У билан кўп  вақтлар битта жойда истиқомат қилганмиз. Бирга ишлаганмиз. Ўз ўрнида доимо, иккимиз биргаликда машғулот ўтказар эдик.

- Фаолиятингиз мобайнидаги энг кучли деб ҳисоблайдиган мураббийлар исми шарифини айта оласизми?

- Қадрдонларим  Марат Қурбонов ҳамда Мелс Китабовларни айтишим мумкин. Бу мураббийлар жуда кўп ёшларни етук маҳорат эгаси бўлишида катта мехнатлари сингган.

- Тимур Ибрагимов, Ғайрат Маткаримов, Нураддин Атаков, Алишер Рахимов, Исроил Мадримов, Абдурасул Исмоилов нега санаб ўтаётганимни англаган бўлсангиз керак. Кимлардир қолиб кетмадими?

- Албатта, хоразмлик боксчиларни санаб ўтдингиз. Марат Китабовни унутдингиз. Аслида, иқтидорли йигитлар жуда кўп эди.

- Ҳозирги кундаги боксчиларимиздан қай бирлари сизнинг жанг олиб бориш услубингизда ҳаракат қилади?

- Исроил Мадримов деган бўлардим. Ҳозирда, унинг ҳаракатлари жуда ёқяпти.

- Нима деб ўйлайсиз, Сизнинг даврингиздаги “Олтин авлод” билан ҳозирги боксчиларимизни таққослаганда қай томон кучлироқ кўриниш олади?

- Ҳозирги кунда машғулотлар бутунлай ўзгарган. Имкониятлар, яратилаётган шароитлар идеал даражада. Бокс федерациясининг ҳам молиявий холати бизнинг давримизга қараганда анчагина барқарор кўриниш олган. Ҳукуматимиз томонидан боксга жуда катта эътибор қаратиляпти. Албатта, бу омиллар чемпионларнинг етишиб чиқиши учун асос бўлмоқда. 

Эслатиб ўтамиз: Тимур Ибрагимов профессионал боксда 38 та жанг ўтказиб, уларнинг 33 тасида ғалаба қозонган. Тўрт марта мағлубиятга учраган ҳолда, бир бора дуранг натижага қайд этган.

Аҳмадбек ЭШМАТОВ сухбатлашди.