Тимур Кападзе: "Афсуки, совғадан фойдалана олмадик"

Суперлиганинг 12-турида "Бунёдкор" - "Олимпик" учрашувида томонлар дурангга имзо чекди. 

Ўйинда ҳисобни Абдуҳолиқов очишга муваффақ бўлди. Шунингдек, мезбонлар таркибидан иккита футболчига қизил карточка кўрсатилди. 59-дақиқада эса Раҳимжонов имкониятларни тенглаштирди. Сўнгги дақиқаларда эса меҳмонлар пенальтига эга чиқишди, лекин ҳисоб ўзгармади. 

Учрашувидан сўнг меҳмонлар бош мураббийи Тимур Кападзе матбуот анжуманида иштирок этди.

"Ўйинда кутилмаган нарсалар кўп бўлди. Яхши тайёргарлик кўрган эдик. "Бунёдкор" учун ҳар бир баҳс финалдек. Биз руҳан тайёр бўлиб баҳсга етиб келдик, аммо қизил карточкалар ўйин фонига таъсир қилди. Менимча, ғалаба қозониш учун имкониятимиз яхши эди. Шунга қарамай,  қалдирғочлар 8-9 киши бўлиб ҳимояланди. Қўшимчасига, дарвозабон ҳам ишончли ўйин ўтказди. Афсуки, совғадан фойдалана олмадик. Ортиқча гап-сўзга хожат йўқ. Мана шундай учрашувлар ҳам бўлади. "Бунёдкор"га омад тилайман. Қаердадир ёшлик қилдик. Бир ярим тайм зич ҳимояни очишга ҳаракат қилдик, имконият яратдик, бироқ уларни дарвозабонини омади келди. Икки жамоага ҳам омад.

Беллашувни бошини яхши бошламаганимиз аниқ. Киришиб кетишда муаммолар бўлди. "Бунёдкор" 11 киши бўлиб футбол ўйнаганида бошқача бўлиши мумкин эди. Тўп назорати бизга ўтгандан кейин, вазият яратишга ҳаракат қилдик. шу сабабли, турли ҳил услубда ҳужум қилишга тўғри келди.

Менимча, Жўрақўзиев беллашувга яхши қўшилиб кетди. Гол киритдик, кетма-кет имкониятлар бўлди, аммо фойдалана олмадик. Қаердадир класс етишмади, яна қаердадир рақиб мудофаа чизиғи ишончли ўйин кўрсатди. Ҳозир, нафақат бизда, балки бошқа грандларда ҳам вазиятдан фойдаланмаслик кузатилмоқда. Реализация биринчи навбатда футболчиларнинг ўзи учун плюс. Бу тажриба билан келади деган умиддаман", - деди Темур Кападзе.