Timur Kapadze: "Har doim ham o‘zim istagandek tarkib yig‘ishni iloji bo‘lmayapti..."

O‘zbekiston Olimpiya terma jamoasi hamda Ispaniya U21 termalari o‘rtasida xalqaro o‘rtoqlik uchrashuvi bo‘lib o‘tdi va o‘yin 0:0 hisobidagi durang bilan yakunlandi. 

Bellashuvdan so‘ng O‘zbekiston termasi bosh murabbiyi Timur Kapadze matbuot anjumanida ishtirok etdi va o‘z fikrlari bilan o‘rtoqlashdi. 

"Assalomu alaykum, hammaga. Bugun ikki tomon uchun ham manfaatli o‘yin bo‘ldi, deb o‘ylayman. Bizda ham, raqibda ham gol urish uchun yaxshi imkoniyatlar bo‘ldi. Biroq gol urish ikki tomonga ham nasib etmadi. Lekin shu uchrashuv orqali ko‘rib oldikki, har qanday jamoa bilan bemalol o‘z o‘yinimizni namoyish etsak bo‘ladi. 

Bahs oldidan har bir futbolchiga imkon berishga qaror qilgandik. Osiyo o‘yinlaridan so‘ng jamoada charchoq alomatlari sezilib turgandi. Saidazamatning jarohati u qadar jiddiy emas. Shunchaki, u maydonda noqulay yiqildi. Umid qilamizki, u tezda safga qaytadi.

Hujumda indiuvidual harakatlar bo‘lmasa, jamoa qiyinchilikka duch keladi. Qaysidir futbolchi o‘yinni o‘ziga olishi bir tomondan yaxshi narsa. Bugun ko‘p vaziyatda biz o‘zimizning texnikamizga ishonib, o‘yin namoyish etdik. Erkinov va Jaloliddinov hujumlarni boshlab berishda jamoa etakchilari hisoblanadi.

Har doim ham o‘zim istagandek tarkib yig‘ishni iloji bo‘lmayapti. Chunki ba’zi liderlarimiz asosiy terma jamoaga chaqirilmoqda. Bir tomondan, yoshlarimizning milliy termaga chaqirilayotgani bizni quvontiradi. Umumiy qilib aytganda, milliy terma jamoa barchasidan ustun bo‘lishi normal holat.

Har bir futbolchimiz uchun Vatan jamoasi muhim bo‘lishi kerak. Termaga chaqiruv olganda, ular boshqa bahonalarni yig‘ishtirishi kerak, deb hisoblayman.

Ikkala bo‘limda ham kamchiliklar va xatolar ko‘zga tashlandi. Nozik tomonlarimiz haqida hali yana bosh qotiramiz va o‘yinlarimizni tahlil qilib chiqamiz. Umuman olganda, ikki bo‘limda ham futbolchilar yaxshi o‘yin namoyish etdi", - dedi mutaxassis.