Тожикистон устози Сегрт: "Ўзбекистон гуруҳ масаласини осонлик билан ҳал қилади, Катанец билан нима ҳақида гаплашганимиз сир эмас, аммо..."

Қатар пойтахти Дохада Осиё Кубоги гуруҳ босқичига қуръа ташланди. Мусобақа қатнашчилари ўз рақибларини билиб олдилар. Бизнинг ён қўшнимиз – Тожикистон илк бор Осиё Кубогида иштирок этади ва улар “А” гуруҳида мезбон Қатар билан битта гуруҳдан жой эгаллади.

Тожикистон терма жамоаси устози Петр Сегртни олдинда муҳим ўйинлар кутяпти. Қолаверса, у бизнинг футболимизга бефарқ эмас. Боз устига Дохада ЎФА биринчи вице-президенти Равшан Эрматов ва терма жамоамиз устози Катанец билан ҳам ўзаро мулоқотда бўлди. Sports.uz журналисти Шуҳратбек Жўраев қуръадан сўнг Тожикистон термаси бош мураббийи Сегрт билан суҳбатлашди.

- Сиз бошчилик қилаётган Тожикистон Осиё Кубогида “А” гуруҳидан жой олди. Қуръадан кўнглингиз тўлдими?

- Бу биз учун муҳим, чунки Тожикистон биринчи марта Осиё Кубоги мусобақасида иштирок этяпти. Ушбу финал босқичида қатнашиш Тожикистон учун жуда катта муваффақият ҳисобланади. Биринчи навбатда шуни айтиб ўтишим керакки, бизда Қатарга нисбатан катта ҳурмат бор. Чунки улар амалдаги Осиё Кубоги ғолиби ҳисобланишади. Яна қўшимча тарзда айтиш жоизки, бир қатор кучли жамоалардан – Хитой ва Ливанга қарши ҳам ўйин ўтказамиз. Ушбу учрашувларда қўлимиздан келганича яхши ҳаракат қилиб, гуруҳдан чиқишга интиламиз.

- Айтинг-чи, қуръадан олдин қайси термаларни кутгандингиз? Гуруҳдаги қайси рақибларни тўғри топдингиз?

- Мен очиғи, Ливанни кутгандим. Аммо ёрдамчим ва вице-президент Қатарга тушишимизни умид қилишганди. Бош котибимиз эса бизни Қатар, Хитой ва Баҳрайн билан бир гуруҳдан жой олишимизни тахмин қилганди. Унинг тахмини жуда яқин бўлди. Бу кучли гуруҳ. Лекин Осиёнинг 24 та кучли жамоалари билан ўйнаш ҳар доим ажойиб бўлади.

- Ўзбекистон жой олган гуруҳ ҳақида нима дея оласиз ва терма жамоамизнинг Осиё Кубогидаги имконияти қандай?

- Ўзбекистонда кучли жамоа бор. Ассоциацияда кучли мутахассислар йиғилган ҳамда бош мураббий Сречко Катанец ҳам жуда мураббий ҳисобланади. Осиё Кубоги финал босқичларида қатнашиш борасида яхши тажриба мавжуд. Ўйлайманки, Ўзбекистон гуруҳ босқичидаги масалани осонлик билан ҳал қилади. Кейинги босқичларда барча жамоаларнинг ҳолатини кўрамиз. Бундай босқичда ҳар қандай натижани кутиш мумкин.

- Сиз учун “ўлим” гуруҳи қайси?

- Барча гуруҳлар кучли. Осиё Кубогида осон гуруҳлар бўлмайди.

- Қуръа ташлаш маросимидан аввал терма жамоамиз бош мураббийи Сречко Катанец билан гаплашдингиз. Сир бўлмаса, нима ҳақида гаплашдинглар?

- Аввало, кўрганимдан жуда хурсандман. У нафақат ажойиб ва кучли мураббий, балки инсонийлик томондан ҳам жуда яхши. Нима ҳақида гаплашганимиз - бу сир эмас, лекин сизга айта олмайман (кулади).

- Ўзбекистон U20 терма жамоамиз тез орада Аргентинадаги жаҳон чемпионатида иштирок этади ва очилиш учрашувида мезбонларга қарши ўйнайди. Термамиздан мундиалдан нима кутяпсиз?

- Сизларда жуда зўр бўлган 20 ёшгача футболчилар йиғилганини кўрдик. Ўзбекистон футбол ассоциацияси бошлиқлари, мутахассислари билан гаплашдим. Улар сўнгги йилларда ажойиб ишларни амалга оширишяпти. Ёш жамоалар билан ҳам яхши ишлашяпти. Мураббий сифатида қилинаётган ишларга ўзимнинг мақтовларимни айтган бўлардим. Биласиз, Германияда ҳам фаолият олиб борганман. У ерда болалар футболига катта эътибор қаратилади. Шу жиҳатдан ёш ўйинчиларни ривожлантириш қай даражада қийин жараён эканлигини яхши биламан. Шунингдек, Грузияда ҳам 21 ёшгача бўлган футболчилар жамоасида фаолият олиб борганман. Бу йўналишдаги тажриба менга асқотади. Шу жиҳатдан бу соҳани ҳам яхши биламан. Уэльсда ишлаган пайтимда ҳам ёш футболчилар билан яхши натижаларга эришганмиз. Аргентина кучли рақиб. Албатта, Ўзбекистонни нафақат Аргентинага қарши учрашувда, балки бутун мусобақа мобайнида ҳам яхши имкониятлари бор. Ҳеч бўлмаса дуранг, балки ғалабага ҳам эришиши мумкин, билиб бўлмайди. Боиси, Ўзбекистон охирги йилларда яхши ривожланди. Бундай турнир жуда қийин. Масалан, 2022 йилги мундиалнинг гуруҳ босқичида Саудия Арабистонининг Аргентинага қарши учрашувини эслаб кўринг. Бундай баҳсларда ҳеч нарсани олдиндан тахмин қилиб бўлмайди. Аргентина – Ўзбекистон баҳси мен учун 50\50. Албатта, мен Ўзбекистонга мухлислик қиламан. Чунки бизнинг яхши алоқаларимиз бор. Ажойиб одамларингиз бор. Ўзбекистонда бўлганман ва улар ҳам мени қўллаб-қувватлашади, деган умиддаман.

- Сизнингча, қайси терма жамоалар Осиё Кубоги финалига чиқади?

- Буни айтиш мен учун жуда ҳам осон. Чунки ҳар қандай мусобақанинг ўз тарихи бор ва бу тарихлар мусобақа бошланиши билан бошланади. Ҳар бир босқичдаги учрашувлар тарихга ёзилиб боради.

- Ўзбекистон чемпионатида тўп сураётган тожикистонлик легионерларни ҳам кузатаётгандирсиз-а?

- Албатта, Тожикистон миллий терма жамоаси бош мураббийи сифатида тожик лигасини кузатиб бораман. Бироқ Ўзбекистонда ҳам кучли чемпионат бор. Футболчилари ҳам кучли ва ажойиб лига деб айтиш мумкин. Ўзбекистон ва Тожикистон Осиё миқёсидаги мусобақаларда бир-бирига қарши ўйнаб туришади. Албатта, Ўзбекистон Тожикистонни кўпроқ мағлубиятга учратган. Аммо Тожикистон мураббийи сифатида умид қиламанки, биз ҳам келгусида сизларни мағлубиятга учрата оламиз. Биз барчамиз бир неча ҳафталардан сўнг CAFA мусобақасида бу саволга жавоб олишимиз мумкин. Ўзбекистонликларга омад тилайман.

Шуҳратбек Жўраев.