Тони Фергюсон ҳамда Жастин Гэтжи кимда имконият юқори? Ўзбек ММА олами вакиллари жавоб берди

9 май куни (Тошкент вақти билан 10 май тонгда)  AҚШнинг Флорида штатидаги “VyStar Veterans Memorial Arena” мажмуасида "UFC 249" турнирининг марказий жангида Тони Фергюсон ҳамда Жастин Гэтжи ўзаро тўқнаш келади. Хориж матбуотига ва интернет тармоқларидаги фикрларга эътибор қаратсангиз, аксарияти Фергюсоннинг имконияти юқори эканлигини тахмин қилишмоқда. Бу борада ўзбек яккакураш олами вакиллари қандай фикрдалигини билиш учун уларга мурожаат қилдик. Қуйида, ушбу мулоҳазаларни сизларга тақдим этамиз.

Азамат “Аждар” Нуфтиллаев – ММА жангчиси

- Тони Фергюсон ҳақиқий жангчи! У Гэтжига ҳеч қандай имконият қолдирмайди. Бу жангда “Эль- Кукуй” ҳар доимги ишини қилади, яъни рақибига жароҳатлар етказади ва ғалабага эришади.

азамат нуфтиллаев

Нодир Қодиров – “Ахмат” лигасининг Осиё минтақаси президенти

-Ҳар иккиси яхши савиядаги жангчилар ҳисобланади. Фергюсон услубидаги ранг-баранглик, ҳар қандай қийин ҳолатдан устамонлик билан чиқиб кетиши, тирсак зарбалари, жиу-житсу ва греплинг борасидаги маҳоратини алоҳида таъкидлаб ўтиш зарур. Жастинда эса, ҳайратланарли  зарба мавжудлигини барча яхши билади. Қисқа қилиб айтганда, қизиқарли жанг бўлади. Имконият барибир Фергюсонда юқори бўлади. Сабаби, Тони бу жангга анчадан буён тайёргарлик кўриб келаяпти, яъни ўз режалари батафсил якунига етган ҳолда етиб келди. Жастинда эса, бу вақт оз муддатни ўз ичига олди. Шунинг учун, бу тўқнашувда Тони ғалаба қозонса керак. Аслида, тахмин қилишни ўзи бўлмайди. Барчаси октагонда ҳал бўлади.

нодир ака
                                        Мансур “ Мангуст” Тўғизбоев – собиқ ММА жангчиси, рефери

- Иккиси ҳам хавфли жангчилар. Тўғриси, мен Гэтжига мухлислик қиламан ва унинг ғалаба қозонишига ишонаман. Чунки, у Фергюсонни ўрганиб чиққан. Бўлмаса, бундай таваккал қилмас эди.

Мангуст

Амин “ Бўри” Эргашев – ММА жангчиси

 - Бу жангда фаворит Тони Фергюсон, деб ҳисоблайман. Сабаби, Тони руҳий томонлама рақибидан устун. Гэтжи интервьюларидан бирида ютқазган тақдирида ҳам охирига қадар жанг қилишини айтиб ўтганди. Бу руҳий томонлама жангдан аввал мағлуб бўлди, деганидир. Яна қўшимча қилиб, Хабиб билан жанг 5-марта бекор бўлиниши туфайли, кўпчилик Нурмагомедовни Тонидан чўчияпти, деган фикрга келган. Буни Гэтжи ҳам кўриб, эшитиб турибди. Шу ҳам унга руҳий жиҳатдан саросима солиб қўйган. Албатта, бу шахсий фикрим! Шунингдек, имкониятлар борасида ҳам Фергюсон яққол устун, деган фикрдаман. Чунки, зарбалар ва “партер”да у мукаммал ҳаракат қилади. Гарчи Гэтжи уни йиқитиб олган тақдирда ҳам тагида туриб, Тони унинг масаласини ҳал қилиб қўйиши мумкин. Чунки унда “армбар” -(қўлни тортиш) ҳамда “кимура” - (қўлни қайириш) услубларини маромига етказиб бажариш салоҳияти бор. Қолаверса, тирсак зарбалари орқали ҳам рақибларини қийин аҳволга солиб қўйган ҳолатларни кўп гувоҳи бўлганмиз. Шундай экан 100% Тони фаворит ва унинг ғалаба қозонишига шубҳа қилмайман. Юқорида таъкидлаб ўтганимдек, бу менинг фикрим. Аслида нима бўлиши ёлғиз Яратганга аён.

Амин Эргашев

Сирожиддин “Эшон” Эшонбоев – ММА жангчиси

- Фергюсонда имконият юқори назаримда... Чунки унда барчаси, яъни “партер”, зарбалар, жиу-житсу жуда яхши ривожланган. Гэтжини иккита жангини кўрганман. У ҳақида етарлича маълумотга эгаман, деб айта олмайман. Гувоҳи бўлган жангларимда у “стойка”да яхши ҳаракат қилганди. Умуман олганда, Тонида имконият яхшироқ, деб ўйлайман.

сирожиддин
                                             Зарруҳ “The Lion”Адашев – “Bellator” жангчиси

- Дастлабки икки раунд ичида Жастин нокаут эвазига юта олмаса, 90% Тони Фергюсон ғалаба қозонади. Тўғри Гэтжида характер бор. Лекин у мушоҳада қилмасдан олдинга ташланаверади. Тони эса, анча айёр жангчи ҳисобланади. У билан ўйлаб жанг қилмаса, мағлубиятга учраши аниқ. Чунки, Фергюсон ҳар доим тик туриб жанг қиладиганлар учун хавфли бўлиб келган.

зарруҳ адашев

Ҳумоюн “Амир” Ибрагимов – ММА жангчиси

- Жастинга тайёргарлик  учун 5 ҳафталик муддат берилди. Тонига қарши бу муддат кам деб ўйлайман. Шундай бўлса-да, Гэтжида бошланғич 3 та раундларда имконият бўлади. Чунки, Фергюсон 1 ва 2- раундларда у қадар фаол жанг кўрсатмайди ва кўп зарбалар ўтказиб юборади.  Жастин ушбу раундлар мобайнида нокаут эвазига жанг тақдирини ҳал қилиши мумкин. Якуний хулосам шуки, ушбу тўқнашув, нокаут эвазига Жастиннинг ғалабаси билан тугайди.

хумоюн1

 Лиля Шакирова – GFC чемпиони

- Фергюсон ғалаба қозонади, деб ўйлайман. Лекин Гэтжи унга жиддий қаршилик кўрсатади ва ажойиб жангни тақдим қилади.

Лиля
                                                         Шоҳруҳ Адашев – ММА жангчиси

Очиғи, уларнинг жангларини мунтазам кузатиб бормайман. Шундай бўлса-да, биринчи раундда Гэтжи Тонини нокдаунга учратади. Лекин якунда барибир Фергюсон оғриқли услуб ёки техник нокаут эвазига ғалабани қўлга киритади.

Шоҳруҳ Адашев

Муҳаммадали Тоштурғунов – кикбоксингчи

- Мен Тони Фергюсонга мухлислик қиламан. Уни жангларини, машғулотларини доимо кузатиб бораман. Ноодатий машқларни бажаради. Бу ҳаммани ҳам қўлидан келавермайди. Бу тўқнашувда ҳақиқатдан ҳам Тонини ғалаба қозониш имконияти жуда катта. Чунки, у ҳар томонлама мукаммал жангчи-да... Қўл-оёқ, “партер” да ишлаши, жисмоний ҳолати, чидамлилиги томонлама бир бош устун деб ўйлайман. Лекин жанговар спорт турларида кутилмаган натижалар ҳам қайд этилиб туради. Битта зарба ҳал қилиб қўйиши мумкин. Шунинг учун, аниқ тахмин қилиш мушкул.

мухаммадали

Матнда хатолик топсангиз, ўша хатони белгилаб, бизга жўнатинг (Ctrl + Enter)