"Торино" клубини бошқараётган укам Шомуродов ҳақида илиқ гапларни айтган" ёхуд Родольфо Ваноли "Қизилқум"ни ҳам мақтади

Айни пайтда Суперлигамизнинг аксар жамоалари Туркиянинг Анталия шаҳрида янги мавсум учун ўқув-машғулот йиғинларини олиб боришяпти. Ҳар куни қайсидир клубларимиз ўзларининг назорат беллашувларини ўтказяпти.

Навоийнинг “Қизилқум” клуби кеча Грузиянинг “Самгурали” жамоасига қарши ўртоқлик учрашувини ўтказди ва 0:0 ҳисоби билан якунланди.

Рақиб жамоа бош мураббийи италиялик Родольфо Ваноли эканлиги эътиборимизни тортди.

Суриштирганимизда, у ҳозирда Италия А сериясида қатнашаётган “Торино” клуби бош мураббийи Паоло Ванолининг акаси бўлиб чиқди.

Баҳс мобайнида клуб вакилидан ўйиндан сўнг мураббий билан бироз суҳбатлашиш истагимиз борлиги ҳақида маълум қилдик. Ўйин якунлангач 62 ёшли Ваноли таклифимизга рози бўлди. Суҳбат давомида эса мураббий итальян тилида гапирди ва сўзларини инглиз ҳамда рус тилларига таржима қилиб туришди.

- Аввало, ўйиндан олган таассуротларингиз ҳақида айтиб ўтсангиз.

- Биринчи навбатда биз жуда хурсандмиз. Боиси, яхши жамоа билан ўйнадик. Биз ҳали жамоамизни тўлиқ шаклантира олмагандик. Ўйинчилар етишмаётганди. Лекин бугун ёш футболчиларимиз ўйинга ўзгартириш кирита олдилар.

- Сиз ўзбек футболи ҳақида қандай маълумотларга эгасиз?

- Биламизки, Ўзбекистонда футбол кенг ривожланиб боряпти. Анча-мунча сармоя киритилмоқда. Биз бундан мамнунмиз. Хорижда ҳам ўзбек футболчилари муваффақиятли ўйнашмоқда. Биз уларни фақатгина олдинга интилишларини тилаб қоламиз.

- Италия А сериясида ўйнаётган ҳамюртимиз Элдор Шомуродов ҳақида яхши билсангиз керак-а?

- Элдор Шомуродов жуда яхши ва муҳим футболчи. Кўп йиллардан бери Италия А сериясида ўйнаб келяпти. “Торино” клубига менинг укам бош мураббийлик қилади. У ҳам Шомуродов ҳақида илиқ гапларни айтган ва укам орқали ҳам Элдорни биламан.

- Жамоангизга рақиб сифатида ўйнаган “Қизилқум” хусусида фикрингиз қандай?

- Яхши жамоа ва яхши мураббий бор. Майдон зўр бўлганида эди, бундан ҳам зўр ўйин бўлармиди?! Иккала жамоага бу ўйин фойдали бўлди ва чемпионатда омад тилайман.