Тўрт футболчимиз дунёнинг энг қиммат лигаларида тўп тепмоқда!

Transfermarkt портали дунёнинг энг қиммат ўнта лигасини эълон қилди. Рейтингда ўзгариш рўй берди. Европанинг машҳур футболчиларини қиммат нархларга сотиб олаётган Саудия Арабистони чемпионати кучли ўнликка қўшилди.

Саудия Арабистони лигаси истеъдодларга бой бўлган ва Европага футболчи етказиб беришда етакчилардан бўлган Нидерландия чемпионатидан ўзиб кетди.

Энг қиммат футбол лигаларида ўйнаётган ўзбекистонлик ўйинчилар сони бугунги кунда тўрт нафарни ташкил қилмоқда.

Хусусан, Элдор Шомуродов умумий рейтингда учинчи поғонада қайд этилган Италия А Сериясида уч йилдан буён тўп тепмоқда. Бу мавсум Ўзбекистон миллий терма жамоаси сардори юқори дивизион дебютанти “Кальяри” жамоаси шарафини ҳимоя қилади.

Бешинчи ўринда қайд этилган Франция чемпионатидаги биринчи ўзбек футболчиси сифатида тарихга номини муҳрлаган Абдуқодир Ҳусанов ҳам дебютига тайёрланмоқда.

19 ёшли марказий ҳимоячи Франция вице-чемпиони – “Ланс” сафидан ўрин олган. Абдуқодир бу мавсум Европа чемпионлар лигасининг гуруҳ босқичида қатнашадиган ягона ўзбек футболчиси бўлади.

Яна икки нафар легионеримиз Туркия Суперлигасидан қўним топган. Ўзбекистон миллий терма жамоаси етакчиларидан Отабек Шукуров “Фатиҳ Карагюмрюк” жамоаси сафида иккинчи мавсумини ўтказмоқда.

Энди турк лигасига Ҳусниддин Алиқулов ҳам йўл олди. Истеъдодли ҳимоячимиз “Ризеспор” жамоасига қўшилди ва янги чемпионатда дебютини ҳам нишонлаб улгурди.

Аслида бу рўйхатда бешинчи ўйинчи сифатида Жалолиддин Машариповни ҳам кўрсатишимиз мумкин эди. У “Ан-Наср” сафида икки йилдан бери тўп тепиб келаётган эди. Бироқ, бир неча кун олдин ҳужумкор футболчимиз Ар-Риёд клуби билан амалдаги шартномани бекор қилди.

Лигадаги футболчиларнинг нархи бўйича энг қиммат чемпионатлари ўнлиги ва суммалар қуйидагича кўриниш олди:

1. Англия Премьер-лигаси (20 та жамоа) – € 10,48 млрд.

2. Испания Ла Лигаси (20 та жамоа) – € 4,67 млрд.

3. Италия А Серияси (20 та жамоа) – € 4,52 млрд.

4. Германия Бундеслигаси (18 та жамоа) – € 4,14 млрд.

5. Франция Лига 1 (18 та жамоа) – € 3,48 млрд.

6. Бразилия чемпионати (20 та жамоа) – € 1,46 млрд.

7. МЛС (29 та жамоа) – € 1,29 млрд.

8. Португалия чемпионати (18 та жамоа) – € 1,24 млрд.

9. Туркия Суперлигаси (20 та жамоа) – € 1,07 млрд.

10. Саудия Арабистони чемпионати (18 та жамоа) – € 1,02 млрд.

Россияликлар Ўзбекистонга қарши ўйнайдиган футболчилар номини эълон қилди