Тошкент илк бор «Катта дубулға» туркумидаги мусобақага мезбонлик қилади

Халқаро дзюдо федерацияси 2021 йилнинг Токио Олимпиадасигача бўлган даври учун мусобақалар тақвимини эълон қилди. Аҳамиятлиси, тақвимдан биз учун аҳамиятли бир қатор мусобақалар жой олган.

Йилни яна бир неча кундан сўнг бошланадиган Қатар Мастерс турнири бошлаб беради. Шундан сўнг дзюдочилар февраль ойида Исроилда жам бўлишади. 5-7 март ойида эса пойтахтимизда илк бор «Катта дубулға» туркумига кирувчи мусобақа бўлиб ўтиши режалаштирилган. Шунингдек, дзюдочиларимизни яна 3 та «Катта дубулға» турнири ва 1 та Осиё чемпионати қатори жаҳон чемпионати ҳам кутиб турибди.

IJF 6-13 июнь кунлари Венгрия пойтахти яна бир бор катталар ўртасидаги дунё биринчилигига мезбонлик қилишини маълум қилмоқда. Бу мусобақа Токио Олимпиадасидан олдин сўнгги расмий турнирдир ва шу билан Олимпиадага рейтинг очколарини тақдим қилувчи турнирлар якунига етади.

Эслатиб ўтамиз, Тошкент 2021 йил катталар ўртасидаги жаҳон чемпионатига мезбонлик қилиши керак эди. Бироқ халқаро ташкилот билан келишилган ҳолда у 2022 йилга кўчирилди. Катта эҳтимолда Тошкентда ўтадиган дунё биринчилиги Париж-2024 Олимпия ўйинлари учун рейтинг очколарини тақдим қиладиган турнирлар қаторида бўлади.