"Тоттенхэм" тарихидаги энг яхши тўпурар вафот этди

Англия терма жамоаси матбуот хизмати машҳур футболчи Жимми Гривз 81 ёшида вафот этганини эълон қилди.

Гривз футболчилик фаолияти давомида "Челси" ва "Тоттенхэм" клубларида ўйнаган. "Аристократлар" таркибида 1957 – 1961 йилларда жами 157 та ўйинда иштирок этиб, рақиб дарвозасига 124 та гол уришга муваффақ бўлган. "Шпорлар" либосида эса 1961 – 1970 йилларда ҳаракат қилган. Айнан у "Тоттенхэм" тарихидаги энг яхши тўпурар ҳисобланади.

Бундан ташқари у Англия терма жамоаси сафида жаҳон чемпионлигини ҳам қўлга киритган. У миллий жамоа сафида 57 та ўйин ўтказиб, ўз ҳисобига 44 та гол ёздириб қўйган.