"Тоттенхэм" уч йилдан буён "Арсенал"ни мағлуб эта олмаяпти

Англия Премьер лигасининг 27-тури доирасидаги Лондон дербисида "Тоттенхэм Хотспур" ўз майдонида "Арсенал"га 1:4 ҳисобида мағлуб бўлди.

Шу тариқа "шпорлар" расмий учрашувларда 2022 йил 12 майдан буён "Арсенал" устидан ғалаба қозона олмаяпти. Охирги марта "Тоттенхэм" рақибини 3:0 ҳисобида мағлуб этган эди. Шундан бери дербиларда "Арсенал" 7 бор ғалаба қозонди, яна бир ўйин дуранг билан якунланди. Қолаверса, сўнгги 5 та учрашувнинг барчаси "канонирлар" фойдасига ҳал бўлди.

Ҳозирда "Арсенал" 28 та ўйиндан сўнг 61 очко тўплаб, чемпионат жадвалида пешқадамлик қилмоқда. "Тоттенхэм" эса 29 очко билан 16-ўринни эгаллаб турибди.