Трентнинг кетиши аввалроқ аниқ бўлган эди

Трент Александер-Арнольд "Ливерпуль"ни тарк этиши ҳақида март ойида Арна Слотга хабар берган.

"Тhe Athletic" нашрининг хабар беришича, Трент ўз қарори ҳақида бош мураббийга март ойидаги терма жамоалар танаффуси пайтида, жароҳатидан тикланаётган вақтда айтган. Шу пайтларда инглиз футболчисининг вакили "Ливерпуль" спорт директори Ричард Хюзга ёзда муддати тугайдиган шартномани узайтиришдан воз кечганини расман маълум қилган.

Слот афсусланганини билдирган, бироқ Трентнинг қарорига ҳурмат билан ёндашган: "Сиз жамоанинг муҳим аъзоси ҳисобланасиз, келинг, мавсумни биргаликда юқори даражада якунлаймиз".

Трент, ўз навбатида, мураббийга "Ливерпуль"дан кетиши унинг жорий мавсумдаги руҳиятига таъсир қилмаслигига ишонч билдирган: "Мен жамоадаги охирги кунимгача бу клуб учун бор кучимни сарфлашда давом этаман".