ЦСКА асосий таркибда шуғулланаётган Рустамбекка қандай баҳо берди?

24 июнь, 23:23
0
Футбол

Бугунги кунда Россия Премьер-лигаси вакили ЦСКА ўзбекистонлик футбол ишқибозлари эътиборидаги клуб саналади. Ҳамюртларимиз Аббосбек Файзуллаев орқали “армиячилар”га мухлислик қилиб келмоқда.

Яқинда ЦСКА машғулотларига 18 ёшли футболчимиз Рустамбек Фомин қўшилгани ҳақида хабар тарқатилган эди.

ЦСКА клуби коммуникациялар хизмати раҳбари Кирилл Брейдо бу маълумотларни тасдиқлади.

- Ҳақиқатан, Рустамбек Фомин ЦСКА ва Ўзбекистон футбол ассоциацияси ўртасидаги ҳамкорлик дастури доирасида асосий жамоамиз билан бирга шуғулланмоқда.

Рустамбек катта иқтидор соҳиби. У 17 ёшидаёқ Ўзбекистон U-20 терма жамоасига қабул қилинган ва айни пайтда бу жамоанинг сардори ҳисобланади.

ЦСКА кейинчалик ҳам Ўзбекистоннинг энг иқтидорли ёш футболчилари учун стажировка тагкио қилади.

Бироқ ҳозирча 18 ёшли Фомин билан шартнома тузиш масаласи кўтарилгани йўқ, - деб ёзди Кирилл Брейло ўзининг телеграм-каналида.

Келишувга кўра, истеъдодли футболчимиз 30 июнга қадар “армиячилар” билан бирга шуғулланиши режалаштирилган.

Аввалроқ, Рустам Фомин ўйнайдиган “Олимпик-Mobiuz” жамоаси бош мураббийи Фарҳод Нишонов Россиянинг “Спорт экпресс” нашрига берган интервьюсида ЦСКАдаги стажировка ҳақида қуйидаги маълмотларни келтирган.

- Рустамбек Ўзбекистон U-20 терма жамоаси ўйинчиси. Биз уни ЦСКА клубига стажировкага юбордик. Агар у ЦСКАга маъқул келса, бу масалани клублар ўзаро ҳал қилади.

Шуни тўғри тушуниш керакки, Фомин бизда ижарада ўйнайди. У аслида “Пахтакор”га тегишли футболчи, уларнинг тарбияланувчиси.

Фомин кучли марказий ярим ҳимоячи, майдон марказида ўйнайди, жуда ҳаракатчан. Худди Аббосбек Файзуллаев сингари меҳнатсевар ўйинчи, - деди Фарҳод Нишонов.

Рустамбек жорий мавсумда Ўзбекистон про-лигасида ўнта учрашувда қатнашиб, битта гол урди. Шунингдек, иқтидорли ярим ҳимоячи Ўзбекистон U-20 терма жамоасида ҳам еттита ўйинда ўз ҳисобига битта гол ёздириб қўйган.

Шомуродов жамоасиз қолмайди!