"Turkish Open". Вакилларимиз 3 та медалга эга чиқди!

7-13 февраль кунлари Туркияда "Turkish Open" халқаро мусобақаси ўтказилди. Дастлаб пумсэчилар, сўнгра кадетлар ва ўсмирлар ўртасида мусобақалар бўлиб ўтди. Турнирнинг сўнгги икки кунида катталар тоифасида ғолиблар аниқланди.

Ўзбекистон миллий терма жамоаси аъзолари ушбу мусобақада 2та кумуш ва 1та бронза медалларига эга чиқишди. 68 кг вазн тоифасида Нажмиддин Қосимхожиев беш нафар рақибини мағлуб этиб, финалга қадар етиб борди. Ҳал қилувчи баҳсда кореялик спортчига омад кулиб боқди.

80 кг вазн тоифасида Шуҳрат Салаев эса уч нафар рақибни таслим қилиб финалга чиқди. Финалда польшалик таэквондочига кичик ҳисобда имконият бой берилди.

+87 кг вазн тоифасида эса Шоҳруҳ Ражабов икки рақибдан устун келиб ярим финалга қадар борди. Афсуски, финал остонасида озарбайжонлик спортчига имкониятни бой берди.

"Turkish Open" мусобақаси совриндорлари:
Кумуш
68 кг - Нажмиддин Қосимхожиев
80 кг - Шуҳрат Салаев

Бронза
+87 кг - Шоҳруҳ Ражабов

Ўзбекистон таэквондо ассоциацияси матбуот хизмати