Туркия клуби Асенсио трансфери бўйича келишувга эришди

ПСЖнинг ҳужумкор ярим ҳимоячиси Марко Асенсио фаолиятини "Фенербахче"да давом эттириши мумкин.

Журналист Санти Аунанинг маълумотларига кўра, турк гранди ПСЖ билан 29 ёшли испаниялик футболчининг трансфери бўйича келишувга эришган. Бироқ, "Фенербахче" футболчининг ўзи билан ҳали келишувга эриша олмагани таъкидланмоқда.

Асенсио 2023 йилда ПСЖ таркибига қўшилган, аммо жамоада ўз ўрнини мустаҳкамлай олмаган. Ўтган мавсумнинг иккинчи ярмини у "Астон Вилла"да ижара асосида ўтказган.

Англия жамоаси сафида ярим ҳимоячи 21 та ўйинда иштирок этиб, 8 та гол урган ва 1 та голли узатмани амалга оширган. Transfermarkt портали Асенсионинг трансфери қийматини 20 миллион еврога баҳоламоқда.