Туркия прокуратураси 17 футбол ҳакамини ҳибсга олиш ҳақида буйруқ чиқарди

Туркия прокуратураси қимор ва ўйин натижасига таъсир қилиш билан боғлиқ иш доирасида 21 нафар шахс, жумладан 17 нафар футбол ҳаками ҳамда Суперлига клуби президентига нисбатан қамоққа олиш ордерини берди. Бу ҳақда "Associated Press" маълум қилди.

Истанбул бош прокуратураси маълумотларига кўра, 18 нафар гумонланувчи Истанбул ва яна 11 та вилоятидаги махсус рейдлар пайтида қўлга олинган.Xакамлар мансаб ваколатларидан суиистеъмол қилиш ва ўйин натижасига таъсир ўтказишда айбланмоқда.

Айни пайтда, Туркия футбол федерацияси (ТФФ) ноябрь ойи бошида 149 нафар ҳакамни турли муддатларга четлатганини маълум қилган эди. Улар ўйинларга пул тиккани учун 8 ойдан 12 ойгача дисквалификация қилинган.

ТФФ раҳбари Иброҳим Ҳажиосманоғлунинг айтишича, турк футбол тизимида "ахлоқий инқироз" кузатилмоқда.