Тажрибали мутахассис Игорь Шквирин “Турон” клуби бош мураббийига айланган ҳолда яна қизғин иш фаолиятига қайтди. Энди олдингидек барча масъулият унинг зиммасида бўлади.

Игорь Анатольевич эскитдан мана шундай тартибда ишлашга ўрганган. Унда мураббий сифатида ўзидан яхши ном қолдириш ва натижа кўрсатиш истаги кучли. “Турон” эса Шквирин учун янги чақириқ бўлди. Чунки кўзга кўринган мутахассис Суперлига дебютанти ва ҳали ғалаба нималигини билмай келаётган клубни бошқаришга рози бўлди.

Устига-устак, дебютант клуб янги мураббий бошчилигидаги илк ўйинни ҳам ўтказишга улгурди ва бахтга қарши “Турон”нинг ғалабасиз серияси яна давом этди.

Хабарингиз бор, ўтган турда яйпанликлар ўз майдонида “Машъал” билан дуранг ўйнади – 0:0. Лекин Шквириннинг режалари жиддийга ўхшаяпти. Бош мураббий эса sports.uz мухбирининг суҳбатлашиш таклифига розилик билдирди. Мазкур интервью ўзида бир қатор қизиқарли мавзуларни қамраб олган.

“Менинг футболда ўзига хос қарашларим бор”

- Игорь Анатольевич, “Турон” футбол клубининг бош мураббийи вазифасига тайинланганингиз билан табриклайман! Айтинг-чи, яққол аутсайдер бўлиб турган жамоани қабул қилиш – бу таваккалона ишми?

- Футболда таваккалчилик доим бўлган. Нафақат аутсайдер, балки бош мураббийи у ёки бу сабаб билан ўзгарган ва етакчилик қилаётган клубни қабул қилиш ҳам ҳақиқий таваккалона ишдир. Бежизга таваккалчининг ишини Худо ўнглабди, дейишмайди ахир. Агар сен бошқарувингдаги клубда бўлаётган ҳолатни синчковлик билан кузатмас экансан, бу ҳам бир таваккалона ишга ўхшаб кетади. Менинг футбол борасида ўзига хос қарашларим бор. Жумладан, қўл остимдаги ўйинчиларни танлаш ва уларга қўйиладиган талаблар масаласида ҳам ўзимга хос тамойилларим мавжуд. Қўл остимдаги ўйинчиларнинг мен тасаввур қиладиган футбол намойиш қилишларини истаб, шунга мос ижрочиларни танлаш пайида бўламан. Ўз тамойилларимдан қайтмаган ҳолда натижа кўрсатишга интиламан. Албатта, танаффус юзага келган пайтда таркибни кучайтириш пайида тушамиз. Шунинг эвазига бугунгига нисбатан кучлироқ ўйин кўрсатишга ҳаракат қиламиз.

шквирин6

- Сизни анчадан бери у ёки бу клуб бош мураббийи сифатида кўрмасдан келаётгандик. Айтинг-чи, ўтган вақт давомида хизматингизга қизиқишлар бўлдими?

- Таклифлар бўлди, аммо бирортаси мени ўзига унчалик жалб этгани йўқ. Шунчаки, ишга қатнаш – бу мен учун қизиқарли машғулот эмас. Менга ўзим бошқарадиган клуб билан қандайдир вазифани бажариш ёқади. Бинобарин, бугунги клубим “Турон”нинг олдига чемпионатдаги ўз ўрнини сақлаб қолиш вазифаси қўйилган. Биз кучлилар лигасида қолиш учун охиригача ҳаракат қилишга тайёрмиз. Муайян бир вазифанинг борлиги мен учун ишни жуда қизиқарли қилади. Футболда ҳар қандай клуб раҳбарияти бош мураббий олдига вазифа қўяди. Жумладан, “Турон” мутасаддилари менга клубни Суперлигада сақлаб қолиш вазифасини қўйдилар. Агар менга биринчи ёки иккинчи лигадаги ва ўз олдига муҳим вазифа қўйилмаган клубдан таклиф бўлганида буни ҳеч иккиланмай рад этган бўлардим. “Про” лицензиясига эга мутахассис шунга монанд равишда иш олиб бориши керак. Иш кишига ҳузур бағишламоғи даркор. Агар сен мураббий сифатида клуб олдига қўйилган вазифаларни бирин-кетин бажарар экансан, бу сенга завқ-шавқ бағишламасдан қолмайди.

“Раҳбарият мени танлаб хато қилмаганликларини исботлаб беришга ҳаракат қиламан”

- Айтишларича, “Турон” раҳбарияти билан музокаранинг икир-чикирларини дарҳол ҳал қилишга эришибсизлар. Қизиқ, олдиндан бир-бирингизни танирмидингиз?

- Ростини айтсам, мен уларни илгари учратмаганман. Дастлаб Қўқонга, сўнгра Яйпанга келганимдан кейин “Турон”ни бошқариш масаласини ҳал қилишга киришдик. Биргаликда ўтириб ҳаммасини муҳокама қилдик ва ҳамкорлик борасида келишиб олдик, бори шу. Юқорида таъкидлаганингиздек, ҳаммаси чиндан ҳам тез фурсатда ҳал этилди. Илгари фаолиятимда бунчалик тез ниҳоясига етган музокаралар бўлмаганлигини айтиб ўтишим даркор. Ўз навбатида энди мен раҳбарият ишончини қозонишим лозим. Уларга мени танлаб хато қилмаганликларини исботлаб беришим учун астойдил меҳнат қилишим даркор. Бу клубга тажрибам билан ёрдамим тегишидан умид қилиб қоламан.

шквирин7

- Маълумки, чемпионатда ўз ўрнини сақлаб қолиш учун кураш олиб бораётган жамоада ишлар бошқаларга нисбатан жуда кўп бўлади. Агар малол келмаса, режаларингиз билан ўртоқлаша оласизми?

- Қандай режаларни назарда тутяпсиз?

- Масалан, биринчи давра ниҳоясига етяпти. Танаффус пайтида қандай ишларни амалга оширмоқчисизлар?:

- Сизни тушундим, масалан, биринчи давра тугаганидан сўнг, йиғин ўтказиш учун Тошкентга бормоқчимиз. Албатта, бундан аввал футболчиларга бироз ҳордиқ чиқаришлари учун икки кун дам олиш имконини ҳавола қиламиз. Шундан сўнг, Тошкентда тўпланамиз. Албатта, ҳаммаси ўзимизга тааллуқли бўлмаган вазиятдан келиб чиқади. Яъни, мен пандемия билан боғлиқ ҳолатни назарда тутяпман. Режамизда уч ҳафта давомида йиғинни Тошкентда ташкил этиш кўзда тутилган. Шундан кейин Яйпанга қайтиб биринчи давранинг охирги ўйинини ўтказиб, иккинчисининг баҳсларига ҳозирлик кўрамиз.

шквирин1_1

“Кўз остимизга олиб қўйган футболчиларнинг тенг ярмини олиб келсак ҳам хурсанд бўламиз”

- Игорь Анатольевич, сизнингча, клуб нима сабабдан шу кунгача ғалаба қозона олмасдан келмоқда? Бу саволнинг жавобини топа олдингизми?

- Бу саволга жавоб топдим, лекин уни очиқ баён этмоқчи эмасман. Чунки менга қадар клубни бошқарган ҳамкасбларимга бу сира ёқмайди. Албатта, ҳар қандай мураббийлар сингари улар ҳам вазият шундай тус олмаслиги учун ҳаракат қилишган. Ҳамкасбларимнинг ишини муҳокама қилишга, уларни вазият тақозо этган тақдирда ҳам танқид остига олишга сира ўрганмаганман. Тайинланганимдан сўнг ўтказилган йиғилишдаёқ ўзимдан олдин ишлаган мураббийларга раҳмат айтганман. Улар ўзларидан ниманидир клубга беришга ҳаракат қилишган. Шундай экан, бошқаларнинг меҳнатини қадрламаслик нотўғри бўларди. Ҳар қандай мутахассиснинг ўзига хос ишлаш усули бор. Мураббий футболни ўз тасаввурлари даражасида кўриб, шунга монанд равишда ишлар ташкил этишга интилади. Ҳаётда бирорта инсон хато қилмасликдан кафолатланмаган. Жумладан, футболда ҳам шундай. Биз оддий инсонлар барчамиз хато қилишга мойилмиз. Хато қилмасдан яшашнинг иложи йўқ. Узоқ йиллар ишлаб келаётган инсон ҳам, албатта, хато қилмасдан қўймайди. Бу мураббийларга ҳам тааллуқли жиҳатдир. Саволингизнинг иккинчи қисмига келсак, “Турон”нинг нима сабабдан шунча учрашувда бирорта ғалаба қозона олмагани – бу мендан олдин жамоада ишлаган мураббийларнинг вазифасидир. Улар нима сабабдан шундай ҳолат юзага келганини таҳлил қилишлари даркор. Ўйлайманки, улар клубнинг нега охирги ўринда қолиб кетганини таҳлил қилишга эришадилар. Бу менинг вазифам эмас. Зиммамдаги вазифа бутунлай бошқа. Юқорида таъкидлаб ўтганимдек, олдимга қўйилган асосий вазифа “Турон”ни қуйи поғонадан олдинга олиб чиқиш ва Суперлигада жон сақлаб қолишини уддалашдир.

шквирин4

- Тез орада ёзги трансфер ойнаси очилади. Афтидан, сизда бу масала юзасидан қандайдир режалар бор бўлса керак, шундай эмасми?

- Ҳа, менда бу масала юзасидан режа бор. Муайян футболчиларни кўзлаб қўйганман. Агар ўша кўзлаб қўйган футболчиларни жамоага олиб кела олсак, жуда соз бўларди. Умуман олганда, ҳар қандай клубда трансфер билан боғлиқ масала силлиқ кечишининг асло иложи йўқ. Режалар бўлади, лекин режани 100 фоиз амалга ошириш бирор-бир клубга насиб этмаган. Агар ўзимиз кўз остимизга олиб қўйган футболчиларнинг тенг ярмини “Турон”га олиб келсак ҳам хурсанд бўлишимиз даркор...

- Бу масалада сизга мураббийлар штабида айнан ким ёрдам беряпти?

- “Турон”да қолган Анвар Бердиев, яқинда бу ерга келган Шуҳрат Раҳмонқулов менга шу масалада кўмаклашишади. Мен бу мутахассисларни анчадан бери биламан. Ҳозирча шуни айтишим мумкин.

“Терма жамоани маҳаллий мураббийлардан бирига топширган маъқулроқ”

- Ўзбекистон терма жамоаси ЖЧ саралаш баҳсларида тарихда илк бор иккинчи босқичдаёқ курашдан чиқиб кетишга мажбур бўлди. Бундай муваффақиятсизликнинг сабабини нимада кўрдингиз? Терма жамоамиз Саудияга ютқазиб қўйиб, ҳаммасидан қуруқ қолди...

- Нима учун айнан Саудия Арабистони?! Бунга қадар ҳам терма жамоамизда муваффақиятсиз ўйинлар бўлди. Мен ЖЧ-2022 учун ўтказилган ўйинлардаги бундай иштирокни саралашлардаги энг омадсизи деб ҳисоблайман. Чунки бунга қадар биз терма жамоани қайси мураббий бошқармасин, албатта саралашнинг якуний босқичига чиққанмиз. Ўшанда ҳам Абрамов, Бабаян каби мураббийлар билан ҳам шу ишни уддалаганмиз. Мен бундай муваффақиятсиз иштирокнинг асосий сабаби сифатида терма жамоада бош мураббий алмашганини кўрсатишим мумкин. Фаластиндан қабул қилинган мағлубиятдан кейин шундай ўзгариш бўлди. Бу ўзгариш якунда ўз таъсирини ўтказмасдан қолмади. Олдинги мураббий Купер матбуот анжуманларидан бирида ўйинни ҳимояга таянган ҳолда ташкил этамиз деганди. Аммо мен унинг бошқарувидаги терма жамоада мана шундай ўйинни кўрганим йўқ. Ҳатто ўртоқлик учрашувларидан бирида терма жамоамиз йирик ҳисобда мағлубиятга учради. Одатда мураббийларнинг кўпчилиги ҳужумкор футбол ўйнашга ҳаракат қиламиз, дейишади. Бироқ Купер...Бизга бу сафар нимадир етишмай қолди. Зарур пайтда киритилган голлар, боя берилган очколар етишмаганлиги эвазига шу аҳволга тушиб ўтирибмиз.

шквирин2

- Сизнингча, Ўзбекистон терма жамоасининг янги мураббийи маҳаллий бўлгани яхшими ёки четдан олиб келган маълқуми?

- Бизда шу пайтгача терма жамоада қанча хорижлик мураббий ишлади? Куперга қадар немис мутахассиси ҳам термамизда ишлаган. Улар билан нимага эришдик, ҳеч нарсага! Менинг фикримча, терма жамоани маҳаллий, футболимизни ичидан жуда яхши биладиган мураббий бошқаргани маъқул. Масалан, Рўзиқул Бердиев ўз иши билан кўпчиликда яхши таассурот қолдириб келади. У “Насаф”даги фаолияти давомида энг яхши футболчилар тарқалиб кетганига қарамай, кўпчиликка умуман таниш бўлмаган ёшлардан рақобатбардош бўлган клубни шакллантира олган. Унинг қўл остидаги “Насаф”нинг бугунги кунда иккита фронтда – Суперлига ва ОФК Кубогида қандай иштирок этаётганини барча кўриб турибди. Менимча, Бердиевни ҳам номзодлардан бири сифатида кўриш яхши бўларди. Бу менинг фикрим албатта. Унинг ишини четдан кузатиб келаётганим боис ҳам шундай деяпман. Яна менинг фикрим шундан иборатки, бизга хорижлик мутахассис керак эмас. Чунки шундай мураббий келса, аввалига маҳаллий менталитет ва футболга мослашиши учун ярим йилдан ортиқ вақт керак бўлади. Немис мутахассиси ишни худди армиядаги режим каби олиб боради. Овқатланишга саф тортиб кетиш, қисқа дақиқаларда еб-ичиш...Менимча, уларда шундай бўлса керак. Бизда ишлар бу тариқа олиб борилмайди. Бизнинг чемпионатда ўзини кўрсатган маҳаллий мураббийлардан бирига терма жамоани бошқаришни топшириш маъқулроқ, деб ҳисоблайман.

“Одил пуллар учун эмас, мамлакат шаъни учун жонини бергудек тўп сурди”

- Одил Аҳмедов терма жамоадаги фаолиятини якунлашга қарор қилди. Бу тўғри тўхтаммиди?

- Одил Аҳмедов бугун неча ёшда? Агар у 25 ёшида терма жамоадаги фаолиятимни якунлайман деб эълон қилганда ҳам бундан ажабланиш мумкин бўларди. Ўшанда ундан нима учун бундай қарорга келдинг деб сўраш мантиққа мос келарди. У терма жамоада анча йиллар ўйнади, ўзидаги борини берди. У фахрий ёшида ҳам шундай тўп сурди. Одил Аҳмедовнинг терма жамоадан кетишга қарор қилгани мени сира ҳайрон қолдиргани йўқ. У шу ёшида ҳам 100 фоиз куч билан тўп суришга интилди. Мен уни ҳақиқий ватанпарвар деб биламан. Чунки Одил ўзидаги борини терма жамоага беришга ҳаракат қилди. Қолаверса, у қўли юпқа инсон эмас. Фаолияти давомида етарлича пул топишга эришди. Шундай бўлса ҳам у терма жамоага келган пайтда бор кучини ишга солди. Мана шуни ватанпарварлик деса бўлади. Шу хислати учун ҳам мен уни ҳурмат қиламан. У пуллар учун эмас, мамлакат шаъни учун жонини бергудек тўп сурди.

шквирин3

- Мўйдин Мамазалумовни сиз кашф этгансиз. Уни Олмалиқдаги ўйинлари орқали мухлислар таний бошлашган. Эшитишимча, собиқ шогирдингиз “Турон”га қайтиши мумкин экан...

- Бундай маълумотларни қаердан оляпсиз, билмайман-у, бу ҳақда ўйланиб қолдим...

“Европа чемпионатида фаворит? “Бельгия!”

- Бугунги кунда бутун дунё қизиқиш билан кузатиб бораётган “ЕВРО-2020” учрашувларини томоша қиляпсизми?

- Албатта, кузатиб боряпман. Айниқса, кечаги учрашувлар ҳақиқий даҳшатнинг ўзи бўлди! Хорватларнинг испанларга қарши олиб борган баҳси менда жуда катта таассурот қолдирди. Аввалига хорватлар ҳисобда олдинга чиқиб олишди. Кейин 1:1 ҳисоби бўлди. Шундан сўнг, рақиблар ким ўзарга гол киритиш борасида баҳслашишга тушиб кетдилар. Футболнинг ҳақиқий жозибаси мана шундай беллашувда юзага келади. Бу нафақат ҳар қандай ишқибозни, балки футбол мураббийини ҳаяжонга солмасдан қўймайди. Жуда қизиқарли баҳс. Сўнгги паллада ҳисобни тенглаштириш, ўйиннинг қўшимча бўлимларга ўтказилиши...Бунақасини ҳар доим ҳам кўравермайсиз. Испанлар барибир тажриба борасида хорватлардан устунлик қилиб, қўшимча бўлимларда бирин-кетин иккита гол уришга эришдилар. Шунингдек, менда Франция – Швейцария учрашуви жуда катта таассурот қолдирди! Бу беллашув ҳам худди Испан ва хорватларники каби сценарий остида ўтди-ю, аммо ҳаммаси пенальтилар сериясида ҳал бўлди. Мен иккала учрашувни чемпионатдаги энг зўр беллашувлар дея бемалол айта оламан. Биласизми, мендан чемпионат бошланиши олдидан қайси терма жамоага мухлислик қилишим ва ғолиб ким бўлиши мумкинлиги ҳақида сўрашганди. Мен азалдан нидерландларга ишқибозлик қилиб келаман. Энг қизиғи, улар кишига ёқадиган футбол намойиш этиб келсалар-да, кўпинча қуруқ қўл билан қолиб кетишади. Бу сафар ҳам бахтга қарши мана шундай бўлди.

шквирин8

- Сизнингча, “ЕВРО-2020”нинг асосий фаворити ким?

- Бу саволга дабдурустдан жавоб қайтариш мушкул. Айниқса, кечаги бўлиб ўтган драматик ўйинлардан кейин киши нима дейишга ҳам ҳайрон бўлиб қоларкан. Бугун яна ғолибликка даъвогар иккита терма жамоа – Англия ҳамда Германия “Уэмбли”да тўқнаш келади. Беллашувдан сўнг, қайсидир бири биринчиликдан чиқиб кетади. Агар инглизлар ютқазишса, ўз уйида қолиб, буни буёғига оддий томошабинга айланишади. Агар немислар ўйинни бой беришса, уйларига қайтишади. Ҳозирча фалон-фалон терма жамоа фаворит, дея кўрсатиш мушкул. Назаримда, Бельгия асосий фаворитдек кўриняпти.

- Демак, асосий фаворит Бельгия?..

- Мен Бельгияни фаворитлардан бири демоқчиман...  

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию
&
Ашуров Бахтийор
30/06/2021 12:08
Туронга мос.
01/07/2021 14:54
Термага хам мос!