U-17 Жаҳон чемпионати кашфиёти Европага йўл олмоқда

Индонезияда бўлиб ўтган Жаҳон чемпионатида Аргентина ёшлари ярим финалгача етиб келди. Финал олдидан жанубий америкаликлар Германияга пенальтилар сериясида таслим бўлиб, 3-ўрин учун курашда Малига ҳам ютқазганди. Турнирнинг чорак финалида Бразилияга қарши ўйинда 3 бор ўз тенгқурларини ранжитган Клаудио Эчеверри 2024 йилда Европанинг топ клубларидан бирига ўтиши мумкин. 

Эчеверри учун курашда 3 та клуб номи тилга олинмоқда. Булар "Челси", "Манчестер Сити" ва "Барселона". Футболчининг товон пули 25 миллион евро, лекин каталонияликлар у учун 30 миллион евро тўлашга тайёр эканлигини маълум қилди. Шу билан бирга, "Ривер Плэйт"дан рад жавобини ҳам олди. Сабаби, "Барса" тўловни бўлиб-бўлиб амалга оширмоқчи. Бу эса аргентиналикларга тўғри келмади ва испан грандига йўқ, деди. Ҳозирча "кўк-анорранглилар"нинг кейинги ҳаракати маълум эмас, яъни улар янги таклиф жўнатадими, йўқми бу ҳақда маълумотлар йўқ. 

Ярим ҳимоячининг ўзи аввалроқ "Барселона"га ўтишга қарши эмаслигини, ўзи Лионель Мессининг мухлисилигини айтганди. Хави ҳам матбуот анжуманида Клаудио ажойиб футболчи эканлигини таъкидлади. Умуман олганда, 17 ёшли ўйинчи билан келишиб олиш каталонияликлар учун муаммо бўлмаслиги мумкин, лекин "Ривер Плейт" билан музокаралар осон кечмайди. Сабаби, клуб фақат нақд пул хоҳламоқда, "Барса" эса бундай имкониятга эга эмас. 

Курашда "Манчестер Сити" ва "Челси" ҳам бор. Иккала клуб Эчеверрини диққат билан кузатиб бормоқда. Аммо ҳали расмий таклиф юборишмади. Футболчини бу қишки трансферлар ойнасида қайсидир Европа клуби сотиб олиши биланоқ, янги жамоаси таркибига бориб қўшила олади. У 2006 йил 2 январда туғилган, яъни футболчи бу вақтда 18 ёшга тўлган бўлади ва қонун бўйича Европа клубида ўйнаш имкониятга эга бўлади.