У кетмайди! “Реал” бир ўйинчи бўйича муҳим қарорга келди

“Реал” ёзда Аргентинадан олиб келган 18 ёшли ҳужумкор футболчи Франко Мастантуоно айни пайтда мослашиш жараёнини бошидан кечираётгани боис, ҳали Хаби Алонсо жамоасида муҳим фигурага айлана олгани йўқ.

Европанинг бир неча клублари иқтидорли ўйинчини январда ижарага олишни мўлжаллаб юрганди.

Таниқли инсайдер Фабрицио Романо бу масалага ойдинлик киритди. Унинг хабар беришича, 18 ёшли Франко Мастантуоно жамоада қолади.

“Реал” раҳбарияти ва жамоа бош мураббийи Хаби Алонсо аргентиналик футболчини клубнинг келажакка мўлжалланган лойиҳасининг муҳим қисми, деб ҳисобламоқда.

Мадридликлар Мастантуонони жорий йилнинг август ойида харид қилган. Шу вақтдан бери у барча мусобақаларда 14 та ўйинда иштирок этиб, биттадан гол урди ва ассист муаллифи бўлди. Футболчининг амалдаги меҳнат шартномаси 2031 йилгача мўлжалланган.