"U o‘z kallasi bilan shu tarkibni qo‘yganiga ishonmayman" - Hamidjon Aktamovdan terma jamoamiz haqida qiziq fikrlar va tavsiyalar

Terma jamoamizning mag‘lubiyatidan qattiq xafa bo‘lgan “Qizilqum” klubi bosh murabbiyi Hamidjon Aktamov sports.uz saytiga qiziqarli intervyu berdi.

- Milliy terma jamoamizning mag‘lubiyatini qanday qabul qildingiz?

- Saudiyaga qarshi terma jamoamiz murabbiysiz o‘ynadi. Bu biz bilgan Abramov emasdi. U yosh yoki bir-ikki yillik murabbiy emas, uzoq yillardan beri tajriba to‘plagan mutaxassis. Eng hal qiluvchi o‘yinga pozitsiyalarni o‘zgartirib yuborishi mumkin emas. Shu jiddiy xato bo‘ldi. Tarkibni bunday tanlanishidan yutqazishi aniq edi. Aslida jamoamiz yaxshi edi. Faqat tarkib va taktika tanlashda adashdi. Shu kuni Abramovni tanimadim, u bunday qilmasligi kerak edi. Aqli bor murabbiy hech qachon bunday yo‘l tutmaydi.

- Achinarlisi, biz hech qachon ikkinchi bosqichda qolib ketmagandik. Demak, noto‘g‘ri yo‘ldan ketganimiz ko‘rinib qoldi...

- To‘g‘risini aytaman, Kuperni noto‘g‘ri haydab yubordik. Chunki Kuperga jamoani tayyorlashga uch-to‘rt yil vaqt bor edi, to‘g‘rimi? U birinchi navbatda bizning “teshik” joylarimizni yopish bilan jamoani tayyorlashni boshladi. Bizdagi asosiy muammo nima? Faqat himoya. Faqat hujumkor o‘ynardik xolos. Hujum himoyadan boshlanadi-da! Kuper jamoani yaxshi tayyorlab borayotgandi. Lekin teshik tog‘orada suv turmaydi-ku! Himoyamizda muammolar bor edi. Kuper o‘sha muammolarni hal qilayotgandi. Agar shu murabbiy qolganida bu bosqichdan oson o‘tardik. Saudiya Arabistoniga qarshi uchrashuvga Kuperning taktikasi kerak edi. Bizga hujumkor o‘yin ham kerak emasdi. Kuperni taktikasi bo‘lganida baribir imkoniyatlarimiz bo‘lardi yoki Shomurodov qochib ketib gol urardi. Abramovni yomonlamoqchi emasman, ammo u kechagi o‘yinda yo‘q edi. U o‘z kallasi bilan shu tarkibni qo‘yganiga ishonmayman. Murabbiylikka bugun kelib qolgan emas.

- Terma jamoamizga qanday murabbiy kerak?

- Chetdan olib kelish kerak. Unga faqat yordam berish va ishiga umuman aralashmaslik kerak. Kelganga yarasha o‘zining butun boshli shtabi, selektsionerlar guruhi bilan kelishi lozim. Termamizni o‘zlari o‘rganib chiqib, shunga qarab jamoani tuzishsin. Oldin terma jamoalar markazi bo‘lardi. U erda Asqar Tolibjonov ishlardi. Ish yaxshi yo‘lga qo‘yilgandi. Hozir shuni yana qayta tiklash kerak deb o‘ylayman. Bu markaz alohida bo‘lishi lozim. Abramovni noto‘g‘ri qilgan ishlari ko‘p-da. Qancha o‘rtoqlik uchrashuvlari o‘tkazilgan bo‘lsa ham doim tarkib o‘zgaraverdi.

- Xorijlik mutaxassis qaerdan bo‘lishi lozim?

- Angliyadan topish kerak. Chunki u erda futbolda umuman dam olish bo‘lmaydi. Kerak bo‘lsa, yangi yil kuni ham o‘ynashadi. Yo angliyalik, yoki germaniyalik murabbiy kerak.

- Futbolchilarga bo‘layotgan e’tirozga nima deysiz?

- Futbolchilarga hech qanday e’tiroz bo‘lishi kerak emas. Siz jurnalistsiz. Sizga metroni haydaysan desa, haydaysizmi?

- Yo‘q.

- Murabbiy futbolchilar pozitsiyalarini o‘zgartirib yubordi. Kimni kallasi bilan qildi, bilmayman. Ming tavakkal qilganda ham tarkibni bunday tushirmasligi lozim edi. Islom To‘xtaxo‘jaevni nimaga olib ketdi? Faqat o‘sha Saudiyaga qarshi uchrashuv oxirlarida tushdi. Birorta xato qilmadi. Tajribasi bor-da. Bunday jamoalarga qarshi tajribali o‘yinchilarni tushirish darkor. Nesterovni oling deb Abramovni o‘ziga necha marta aytganman, olmadi. Endi terma jamoamizni boshqaradigan murabbiy birorta klubga aloqador bo‘lmasligi kerak. Xohlaysizmi-xohlamaysizmi, meni qo‘yishsa ham “Qizilqum”dan 3-4 tasini tortaman, Ro‘ziqul Berdievni qo‘ysa u ham shunday qiladi yoki boshqasi ham. Har qanday murabbiy baribir minimum o‘zining ikki-uchta futbolchisini olib keladi. Bilasizmi, terma jamoani ikkita qilish kerak - A va B. Ko‘p mamlakatlarda ikkita terma jamoa bo‘ladi. Qarang, yig‘inlarga 45 tagacha o‘yinchi chaqirgan paytlar bo‘ldi. Ularni hammasini o‘ynata olarmidi? Ikkita terma jamoa va ikkita murabbiy qo‘yish lozim. Keyin yakunda ikkalasi birlashtiriladi. Hozir futbolchilikni tugatiboq o‘zicha murabbiy bo‘lib olgan yoshlar ko‘payib ketdi. Futbolchilik va murabbiylik faoliyati boshqa-boshqa. Er bilan osmoncha farq bor.

- Nima deb o‘ylaysiz, chempionatimiz saviyasi pastlab ketganmi? Terma jamoamizning muvaffaqiyatsizligidan keyin Superliganing asl holati ko‘rindi deb o‘ylaysizmi?

- Terma jamoani jahon chempionati saralash bosqichidan chiqib ketganiga Superligani umuman aloqasi yo‘q. Ichki chempionatimiz qaytanga oldingi yillarga nisbatan yaxshi o‘tyapti. Bunga hech qanday e’tiroz yo‘q. Terma jamoa bo‘yicha nima uchun Superliga javob beradi? Tarkibda kimlar o‘ynadi? Deyarli legionerlar: Eldor Shomurodov, Odil Ahmedov, Oleg Zoteev, Vagiz Galiulin, Odil Hamrobekov, Otabek Shukurov, Ikrom Aliboev, Doston Hamdamov, Jaloliddin Masharipov...Odil Ahmedov markaziy himoyada 8 yil oldin Qatar bilan o‘yinda o‘ynagan ekan. O‘ta muhim uchrashuvga uni yana markaziy himoyaga qo‘ydi. Superligada hammasi halol bo‘lyapti, pro-ligani bilmayman.