УЕФА ФИФА бойкоти ортидан жаҳон чемпионатига ўзининг муқобилини яратмоқда

Европа футбол ассоциациялари иттифоқи – УЕФА бир неча йиллар олдин ишлаб чиқилган концепцияларга эга бўлиб, улар асосида жаҳон чемпионатига минтақавий ёки глобал миқёсда муқобил турнир ташкил этилиши мумкин.

Манба маълумотига кўра, бу ғоялар яна кун тартибига қайтмоқда. Сабаб – ФИФА томонидан таклиф этилаётган тижорат ислоҳотлари ва қатор конфедерацияларнинг бу режаларга очиқча эътирози. Шу муносабат билан материалда УЕФА тайёрлаган “Глобал миллатлар лигаси” формати яна бир бор эсга олинади. Унга кўра, ҳар бир дивизионда саккизта жамоадан иборат финал босқичлари ўтказилиши, уларга эса олдиндан минтақавий саралаш мусобақалари орқали йўлланма берилиши кўзда тутилган эди. Мазкур концепция 2017 йилдаёқ тайёрланган бўлиб, Европа чемпионати ва жаҳон чемпионати ўтказилмайдиган тоқ йилларда қисқа мини-турнирлар ўтказиш ғоясини ўз ичига олган.

Режага кўра, ҳар бир финал босқичи чорак финалдан бошланиши керак эди. Дивизион таркибида учта европалик жамоа, Жанубий Америкадан иккита, Африка, Осиё ва Шимолий Америкадан биттадан жамоа қатнашиши режалаштирилган. Океания учун эса энг қуйи дивизионда битта ўрин ажратилиши назарда тутилган. Ҳозирда турнирлар ҳуқуқларини хусусий инвесторларга бериш масаласи муҳокама қилинаётган бир пайтда, УЕФА ушбу лойиҳани қайта кўриб чиқиш ёки янгича шаклда мослаштириб, ўзининг межқитъа мусобақасини йўлга қўйиш имкониятини ўрганмоқда.

Таъкидланишича, УЕФА бу режаларни аввал тўлиқ амалга оширмаган. Бунга, жумладан, ФИФАнинг клублар ўртасидаги жаҳон чемпионатини кенгайтириш ташаббуслари ҳам сабаб бўлган.