УЕФА раҳбари Чеферин нега ЖЧ-2026 финалига бормагани маълум бўлди

УЕФА президенти Александер Чеферин "Жаҳон чемпионати — 2026" финал баҳсини томоша қилиш учун келмади. The Times нашри ёзишича, бунга АҚШ терма жамоаси ҳужумчиси Фалорин Балогунга берилган қизил карточканинг бекор қилиниши сабаб бўлган. У Бельгияга қарши 1/8 финал учрашуви (1:4) олдидан майдондан четлатилган эди.

ОАВ маълумотларига кўра, АҚШ президенти Дональд Трамп шахсан ФИФА раҳбари Жанни Инфантино билан боғланиб, Балогун бўйича қарорни қайта кўриб чиқишни сўраган. Шундан сўнг футболчига берилган қизил карточка бекор қилинган.

Манбалар таъкидлашича, Чеферин ва Инфантино ўртасидаги муносабатлар сўнгги пайтларда жуда таранглашган, Балогун атрофидаги вазият эса “охирги томчи” бўлган. Бундан ташқари, Чеферинни АҚШ ҳокимиятининг Сомалидан келган ҳакам Омар Артанга мамлакатга киришга рухсат бермаслик қарори ҳам жиддий ранжитгани айтилмоқда.

УЕФА раҳбари ФИФАнинг жаҳон чемпионатида иштирокчи жамоалар сонини ошириш ташаббусидан ҳам, мусобақа давридаги нарх-наво сиёсатидаги ўзгаришлардан ҳам қониқмагани хабар қилинмоқда.

Эслатиб ўтамиз, жаҳон чемпионати — 2026 финалида Испания терма жамоаси Аргентинага қарши баҳсда 1:0 ҳисобида ғалаба қозонди. Беллашув АҚШнинг Ист-Ратерфорд шаҳрида жойлашган «Метлайф» стадионида бўлиб ўтди. Учрашувга Словениядан келган ҳакам Славко Винчич бошчилик қилди.