УЕФА Суперлига клубларини мусобақадан четлатса, янги мавсумда уларнинг ЕЧЛдаги ўрнини қайси жамоалар эгаллаши мумкин?

Англия, Испания ва Италиянинг гранд клублари янги ташкил этилган Суперлигада иштирок этиш учун янги мавсумдан бошлаб, Чемпионлар лигасидан “бадарға” қилиниши мумкин. Келинг, агар ушбу клублар чиндан ҳам ЕЧЛдан четлатилса, 2021/22 йилги мавсумда қайси жамоалар уларнинг ўрнини эгаллаши мумкинлиги ҳақида бироз мулоҳаза юритиб кўрамиз.

Топ клубларнинг Чемпионлар лигасида иштирок этишдан бош тортиши саралаш босқичидаги вазиятни мураккаблаштирди. Англия, Италия ва Испаниядан тўрттадан клуб тўғридан-тўғри турнирнинг гуруҳ босқичига йўл олиши керак, аммо айнан мана шу мамлакатларнинг 12 та клуби Суперлигада иштирок этишга розилик билдирган. Ҳозирча ушбу “қўзғолон”дан сўнг, ҳар бир мамлакатдан нечтадан иштирокчи жалб этилиши ва улар қандай аниқланиши ҳақида тушунча йўқ. Энг осон вариант, албатта, инқилобчиларни ҳисобдан чиқариб ташлаш ва йўлланмаларни чемпионатда улардан кейинги ўринларни эгаллаган жамоаларга беришдир.

Англия

Агар ҳозирги вазиятни инобатга олиб фикр юритсак, "Лестер" ва "Вест Хем" инқилобчиларни олиб ташлаган ҳолда мавсумни Англиянинг тўртта энг яхши жамоалари орасида хотиржамлик билан якунланиш учун етарли очкога эга.

Аммо қолган иккита ўрин учун кураш давом этишини кўриш мумкин. "Эвертон", "Лидс" ва "Астон Вилла" Чемпионлар лигаси йўлланмалари учун асосий даъвогарларга айланади. Бирмингемликлар захирасида иккита ўйин бор ва шу сабабли, уларда ҳам кучли тўртликка кириш имконияти мавжуд.

Италия

Италияда Суперлиганинг учала аъзоси ҳам кучли тўртликдан жой олишган, гарчи "Ювентус" "Наполи"дан атиги икки очко олдинда бўлса-да, мавсум якунигача ҳали кўп нарса ўзгариши мумкин. Шунга қарамай, агар жадвалдаги ҳозирги ҳолатга назар солсак ва "Интер", "Милан" ҳамда "Ювентус"ни ўчириб ташласак, Чемпионлар лигасидаги ўринлар учун катта курашни кўрмаймиз. Чунки 4-ўриндаги “Рома” 5-ўринда қайд этилган “Сассуоло”дан нақд 8 очкога илгарилаб кетган.

Испания

Испанияда бу ҳолат худди Италиядаги вазият билан деярли бир хил. Бизнинг жадвалда 4-ўринда қайд этилган “Реал Сосьедад” 5-ўриндаги “Гранада”дан 8 очко кўп жамғарган. Мавсум якунланишига саноқли турлар қолганини инобатга олсак, “Сосьедад” ўз ўрнини бериб қўйишига ишониш қийин.

Кучли бешлик чемпионатлари орасида Франция ва Германия грандлари Суперлигага қўшилишдан бош тортмоқда. Улар бу борада УЕФАнинг позициясини тўлиқ қўллаб-қувватлашга тайёр.

Янги ташкил этилган турнирнинг президенти Флорентино Перес бўлди. Жоэль Глэйзер ("Манчестер Юнайтед") ва Андреа Аньелли ("Ювентус") президент ўринбосарлари этиб тасдиқланди. Маълум бўлишича, бош ҳомий машҳур JP Morgan банки бўлади. Улар лигага 4,6 миллиард фунт сармоя киритишга тайёр. Банк ўз маблағларини трансляция ҳуқуқларини сотишдан ва келажакдаги бошқа даромадлардан қайтаришни режалаштирмоқда.

Хулоса ўрнида шуни айтмоқчиманки, Суперлига ташкил этилиб, гранд клублар Чемпионлар лигасини тарк этган тақдирда ҳам, ушбу тарихий мусобақа ўз нуфузини йўқотмайди. Аксинча, Европада янги грандлар пайдо бўлади. Футбол ҳар икки ҳолатда ҳам ҳеч нарса йўқотмайди.