УЕФА янги қоидани мажбурий тарзда қўлламайди

УЕФА ўз мусобақаларида футболчилар можаро пайтида оғзини ёпиб гапиргани учун автоматик тарзда қизил карточка кўрсатилмаслигини маълум қилди.
⠀
The Athletic хабарига кўра, Европа футболи раҳбарияти бу ҳақда пайшанба куни аъзо ассоциацияларга расмий ахборот юборган.
⠀
Шу тариқа, IFAB томонидан жорий йил апрель ойида қабул қилинган янги қоида Чемпионлар лигаси, Европа лигаси, Конференциялар лигаси, шунингдек, Европа чемпионати ва Миллатлар лигаси баҳсларида мажбурий тарзда амал қилмайди.
⠀
УЕФА баҳсли вазиятларда ҳакамларга ўз хоҳишига кўра қарор қабул қилишни тавсия этмоқда. Бироқ агар футболчи оғзини ёпиб гапириши спортга хос бўлмаган хатти-ҳаракат сифатида баҳоланса, унга сариқ карточка кўрсатилиши лозим.
⠀
Бундан ташқари, УЕФА VAR ваколатларини ҳам кенгайтиришга қарор қилди. Энди видеоассистентлар нотўғри тайинланган бурчак тўпларини ҳам текшириши мумкин. Агар ҳакам хато қилгани тасдиқланса, бурчак тўпи ўрнига дарвозадан зарба белгиланади.