"UFC 302" турнирига оид жуда қизиқ маълумотлар ва статистикалар!

Ислам Махачев ва Дастин Порье! 

Ислам ҳозирда энг узун камарини ҳимоя қилаётган чемпионлардан бири - 2 маротаба (Леон Эдвардс, Вейли Жанг ва Алешандре Пантожа каби);

 Якшанба тонгида Махачев ғалаба қозонса, титульни 3 марта муваффақиятли ҳимоя қилган тарихий чемпионлар клубига қўшилади. Хабиб Нурмагомедов, Фрэнки Эдгар, Бенсон Хендерсон ва БиДжей Пеннлар бу вазнда камарларни рекорд даражада 3 маротаба кетма-кет ҳимоя қила олишган.

 Махачевнинг 13 жангдан иборат ғалабали серияси айни дамда амалдаги энг узун ғалабали серия ҳисобланади.  Махачев сўнгги йилларда зарба аниқлиги борасида ҳам кескин юксалишга эришган. Ҳозирда унинг зарбалари аниқлиги фоизи 60 % га тенг. У бу кўрсаткич бўйича фақатгина Джастин Гейбджидан озгина орқада (Гейджининг кўрсаткичи 61%)

 Махачев уринишларнинг 61 % ида рақибларига муваффақиятли тейкдаунни амалга оширган. Масалан, бу натижа афсонавий БиДжей Пеннинг 66% лик муваффақиятли тейкдаун натижасидан сал пастроқ. Ўзи эса 91 % тейкдаунлардан ҳимояланган. Бу борада у ҳозирча Глэйсон Тибау натижасидан ортда бормоқда (92%).

Дастин Порье якшанба тонгида ғалаба қозонса, мутлақ чемпионлик учун энг узун жанглар сериясини бошдан кечирган жангчига айланади (31 жангдан сўнг чемпионга айланади).
Олдинроқ, Чарльз Оливейра чемпион бўлиш учун промоушен таркибида 28 жангда иштирок этишига тўғри келган эрса, Майкл Биспингнинг муваффақитяи учун 27 жанг талаб қилинган. 

 Енгил вазнга ўтганидан сўнг Дастин Попьенинг рекорди 14-4 (1 NC) бўлиб, унинг учта мағлубияти титуль жангларида кузатилган. Порье ҳозирча 22 маротаба UFC промоушенидаги жангларда ғалаба қозониб, энг кўп ғалаба қозонган жангчилар рўйхатида Джим Миллер (26 ғалаба), Андрей Орловский (23 ғалаба) ва Дональд Серроне (22 ғалаба) дан кейинги ўринларда кетмоқда.

 Порье 15 жангини муддатидан олдин якунлаган ва финишлар бўйича Чарльз Оливейра (20), Джим Миллер (18) ва Дональд Серронедан (16) ортда бормоқда. Порье, шунингдек, тарихдаги дахшатли страйкерлардан бири ҳисобланади. У 11 маротаба рақибларини нокаутга учратган ҳисобланиб, бу кўрсаткичга кўра фақат Деррик Льюис (15) ва Мэтт Браундан (13) ортда қолмоқда.

 Ва, албатта, Порье нокдаунлар бўйича ҳам элит жангчилар тоифасидандир. У рақибларини нокдаун қилишда ҳам промоушеннинг тарихдаги топ-5 жангчилари қаторидан жой олган. Серроне (20), Андерсон Силва (18), Джереми Стивенс (18) ва Эдсон Барбоза (16). Жангдан кейинги бонус бўйича Порье ҳисобида 14 маротаба 50 минг $ миқдоридаги қўшимча маблағлар мавжуд.

Шон Стриклэнд - Пауло Коста!

 Собиқ ўрта вазн чемпиони Шон Стрикленд ўрта вазнга кўчиб ўтганидан сўнг 9 жангда иштирок этган. 6 ғалаба ва 3 мағлубият. 3 мағлубиятидан иккитаси очколар ҳисобига кўра, деярли тенгма-тенг жангларда содир бўлган. Джаред Каннонье ва Дрикус дю Плессига қарши. Ва фақат бир маротаба ўрта вазнда Алекс Перейрадан нокаутга учраган.

 Ўрта вазндаги жангларида Шон Стриклэнд ўзининг бокс кўникмаларини дахшатли даражада намоён қила олмоқда. Масалан, 9 жангдан фақат иккитасида рақиблари унга нисбатан кўпроқ аниқ зарбалар йўллай олишган. Стриклэнд эса, Исраэль Адесанья, Дэаред Каннонье, Нассурдин Имавов, Юрайя Холл, Дрикус дю Плессиларга стойка масаласида дарс ўтиб қўя олган.

 Стриклэнд нафақат прагматик, балки, ёрқин жанглар кўрсатишни ҳам бошлаб юборган. У сўнгги учта жангида 3 маротаба бонус соҳибига айланди.

 Учта вазнда ярим ўрта, ўрта ва ярим оғирда ғалаба қозонган кам сонли жангчилардан. Шунингдек, зарбалар аниқлиги ва зарбаларга чап бериш бўйича ўз дивизионида 2-ўринда бормоқда. (Аниқ зарба бериш борасидан Дю Плессидан, зарбаларга чап бериш ва блок қўйиш борасида Нассурдин Имавовдан ортда).Энг муҳими, Шонни ҳақиқий очко машина дейишимиз мумкин. Фаолиятидаги промоушенда қайд этилган 15 ғалабасидан 11 таси очколар ҳисобига амалга оширилган.

Пауло Коста эса Стриклэнднинг ғирт антоними. Ғалабаларнинг асосий қисмини нокаутлар эвазига қозонган эрсада, лекин сўнгги жангларида унинг нокаут кучи йўқолиб қолгандай. Шунингдек, Коста сўнгги 5 жангида 3 маротаба мағлубиятга учради. Ғалабалари эса пенсионер Йоэль Ромеро ва Люк Рокхолдлар устидан қозонилди.

Турнир давомида кузатишга арзирли жангчилар...

 Жаилтон Алмейда - тейкдаун машина, ярим оғир вазн жангчиси, бира тўла оғир вазнда жанг қилмоқда ва баҳодирлар вазнида ҳам ўзининг кураш рақсига барчани ўйнатмоқда. Қисқа вақт ичида, жангларда рақибларини 27 маротаба ерга муваффақиятли боса олган ва ҳаттоки мағлуб бўлган бўлсада кураш борасида оғир вазндаги феномен - Кёртис Блэйдсни ҳам 9 маротаба тейкдаунга ола билган. Бу сафарги рақиби, молдовалик Александр Романов ҳам курашчи. Кўрамиз бу жанг қандай кечаркин?!

Александр Романов - ўз ўрнида Саша ҳам анойи жангчилардан эмас. Фаолиятидаги (16-3) 16 ғалабасидпн 15 тасини финиш орқали муддатдан олдин якунлаган бўлса, шулардан 11 тасида 1 раунддаёқ рақибини таслим қилишга эришган.

 Рэнди Браун - ярим ўрта вазн жангчиси Рэнди ажойиб серия қайд этиб келмоқда. Хусусан, 2021-йилдан бошлаб ҳисоблаганда 7 жанг ўтқазган Браун фақатгина Джек Делла Маддаленага мағлуб бўлган бўлса, қолган 6 жангида ғалабага эришган.

 Элизеу Залески дос Сантос - проспектлар кушандаси дея қараладиган бразилиялик капоэйра устаси топ жангчилар ҳисобланмиш Шон Стриклэнд, Бенуа Сен-Дени, Абубакар Нурмагомедов ва Омари Ахмедовларни мағлубиятга учратган ва Ринат Фахретдиновни нокдаунга тушириб, жанги дуранг бўлишигача олиб борган.

 Роман Копылов - ўрта вазндаги энг ёрқин стойка вакилларидан биттаси, сўнгги жангида Энтони Эрнандезга сабмишен эвазига мағлуб бўлган ва ўзининг 4 жангдан иборат нокаутли сериясига барҳам берди. Бу сафарги рақиби кикбоксинг бўйича залворли натижаларга эга. Серкан Ўзчағлаян ва Алекс Перейра устидан қозонган ғалабалари, менимча, ортиқча таърифга муҳтож эмас. Икки стойка жангчиси баҳси бомба бўлади.

                                                                                                                                                                                                                                                                                                                                  Маҳмуджон Жабборов тайёрлади!