"UFC 325" турнири: Кўзлар Волкановскида, Лопез эса қасос ўтида ёнмоқда!

"UFC 324" ҳаёжони совумасдан, кўзлар "UFC 325" турнирига қаратилмоқда. Ушбу оқшом Ўзбекистон вақти билан 1 февраль тонгга яқин 03:00 да бошланиши режалаштирилган.

Турнирнинг марказий тўқнашуви ярим енгил вазн чемпиони Александр Волкановски ва даъвогар Диего Лопес ўртасида бўлиб ўтади. Аввал улар (Илия Топуря юқори вазнга кўтарилганидан сўнг) бўш қолган камар учун курашишган эди. Ғалаба қозонган Александр ва орада Жан Силвани мағлуб қилган Диего баҳси Дана Уайт наздида мухлислар учун томоша қилишлари керак бўлган муҳим жанг экан. Мухлислар ва мутаҳассислар тоифаси эса бу тўқнашув Лопез ўрнига мағлубият нелигин билмай келаётган  ё Мовсар Евлоев, ё Лерон Мёрфи ила ўтказилиши мантиққа яқинроқ эканлигини иддао қилмоқда.

Дананинг бундай қарорлари ўзини ҳақ чиқариш билан бирга, мухлислар истаётган жангларни ташкиллашни бироз кечроққа сураётгани, қизиқишни ушлаб туриш ҳамласи эканини англаб етиш учун даҳо бўлиш шарт эмас. Шу тариқа узоқ кутилган тўқнашувлар пайдо бўляпти. Бу эса ҳам спорт, ҳам бизнес тарафлама UFC нинг брендига жуда катта таъсир ўтказмоқда.

Диего Лопес мазкур промоушенга 2023 йилда қўшилди ва уч йилда 8 дона баҳсда кўриниш берди. "8" рақами ҳайратланарли экани билан бирга бирорта зерикарли ёки ўрта миёна "performance" ига гувоҳ бўлмадик. Мексикалик жангчи уч йилда дебютантдан чемпионлик номзоди бўлишга, мағлубиятдан кейин такрор чемпионликка даъво қиладиган даражада супер йўлни босиб ўтди.

ММА нинг барча жабҳасида ўзини кўрсата олган Диего хоҳ греплингда бўлсин, хоҳ муай-тайда – маҳоратини исботлай олди. Кучли зарбалари, бўй авантажи, тейкдоунга уринаётган рақибини бойнидан бўғиб, ост тарафдан оёқларини белига ўтказиб, ушбу вазиятни ўз фойдасига ўтказиб олиши уни юқори тезликда шу даражагача олиб келди. 8 баҳснинг 6 таси ғалаба, 2 донаси мағлубият. Мағлубиятларнинг биттаси UFC дебютидаги Мовсар Евлоевга қарши атиги беш кун олдин қабул қилинган, шунга қарамай уч раунд, ҳам тик оёқда, ҳам ердаги жангда деярли тенгма-тенг қилган жанги, яна биттаси эса Волкановскига қарши (Топуриягача ушбу вазндаги якка ҳукмронлик) илк беш раундлик жанги эди. Ғалабаларининг учтаси биринчи раунднинг ўзидаёқ, биттаси иккинчи раунддаги муддатидан олдин қучилган зафарлар, яна иккитаси эса тўлиқ уч раунд бўлиб ўтган жанглардаги ҳакамларнинг қарори билан олинган эди.

Бу сафар беш раундлик тажрибага эга ҳам бўлди, психологик қўрқув кетди ва машғулотлар жараёнида қилинган хатолар устида ишланди. Шояд ғалаба қозонса, Голливуд кинорежиссиорлари “Чақмоқ тезлигидаги мувафаққият” номли бадиий филм ишлаб юборишса ҳам бўлади…

Волкановски мағлубиятсиз келаётган Мовсар Евлоев ва Лерон Мёрфидан қочаётгани йўқ, аксинча 37 ёшда бўлишига қарамай улар билан баҳсни истаяпти, лекин UFC бунга имкон бермаяпти. Австралиялик бу вазннинг қироли десак, янглишмаган бўламиз. Вақтида чемпионлик камарини 5 бор ҳимоя қилди. Олтинчисида эса тоғларни талқон қиладиган ёшдаги Илияга камарни бой бериб қўйди. Топурия вазнни тарк этиши биланоқ яна ўз курсисига ўтириб олди, бу сафар яна яхшилаб жойлашиб олиши сўроқ остида. Зеро Волкановски ҳам аввалги ёш Волкановски эмас – 38 га қараб кетяпти. Танганинг иккинчи тарафида эса Диего Лопез, Жан Силва, Мовсар Евлоев ва Лерон Мёрфи каби номлар бор.

Ҳа, реакция ва зарба кучлари аввалгидек эмасдир, лекин аввалгидан жуда узоқ ҳам эмас. Буни охирги бор жанг қилган рақиби Диего Лопесдан сўрасангиз тасдиқлайди. UFCсафсоналаридан бири Макс Холлоуэйни уч бор мағлуб қилган “бўри” қариса ҳам “итлар”га ўлжа бўлмайдигандек гўё (бўри қариса, кўпакларга масхара бўлар экан, мақолидан).

Ўнг қўл хук зарбалари ва қарши ҳужумлари хавфли экани билан танилган жангчи тик оёқда ҳам мукаммал. Лекин партердаги ҳаракати борасида ижобий сўзлар айта олмаймиз. Шу боис, Александр қўлдан келганча масофада жанг қилиши керак, масофада эса бой авантажига эга бўлган Диего Лопес бу жабҳада ҳам устун кўриняпти, зеро кичик бўй билан чаққонроқ ҳаракат қила олиш одатда ёш ва тезкор жангчиларга хос хусусиятлар саналади.

Азизбек ҒОЗИЙ тайёрлади