"Уларни таркибида бизнинг чақириғимизни қабул қилмаган бир нечта футболчилар бор". Алиқулов жамоаси пешқадамга айлангач, нималарни айтди?

Кеча про лиганинг 20-тури старт олди. Унда етакчилар – “Бухоро” ва “Машъал” ўз ўйинларини ўтказдилар.

Бухороликлар Нукусда “Арал”га 1:0 ҳисобида ютқазишди. “Машъал” эса Муборакда “Хоразм”ни мағлуб қилди. Натижада муборакликлар энди мусобақа пешқадамига айланиб олдилар.

“Машъал” устози Асрор Алиқулов эса учрашувдан кейин саволларга жавоб берди.

- Икки хил бўлим бўлди. Биринчи бўлимда “Хоразм” кўпроқ ҳимояда ва қарши ҳужумда ўйнади. Иккита тўп фарқи билан олдинга чиқиб олганимиздан кейин улар босимни кучайтиришди. Натижада жамоамизда парокандалик ва хатоликлар кузатилди. Футболчиларда ўзларига ишонч йўқола бошлади. Ўйинчиларга бироз маҳорат етишмади. Катта куч билан ҳужумга ўтишди. Ўйин охирларида ҳам имкониятларга эга бўлдилар. Барибир шундай ҳолатда ҳам ғалабани сақлаб қола олдик. Меҳнати учун футболчиларимизга миннатдорчилик билдираман.

- “Машъал”ни сафарда “Хоразм”га қарши ўйини билан бу сафарги ўйини ўртасида қандай фарқи бўлди?

- “Хоразм”да бир қанча футболчилар Суперлигада тўп суришган. Ўйинчилари анча тажрибали. Сафардаги беллашувга биз йўқотишлар билан боргандик. Бу ўз таъсирини кўрсатди. Бугун биринчи бўлимда яхши ҳужумлар қилдик. Иккинчи бўлимга келсак, қанотдаги футболчиларимиз анчадан бери ўйнашмаганди. Кўпроқ захирадан майдонга тушишарди. Кейин биз ўйинчиларни захирадан туширдик. Захирадагилар майдонга ҳисобни ушлаб қолиш учун туширилди, десам тўғри бўлади.

- Бугун захирадан ҳужумчиларни майдонга туширишга қарор қилдингиз...

- Захирада ўтирган иккита футболчимиз жароҳати туфайли ўйинда қатнаша олмасди. Имкониятимиз чекланганди. Айрим ҳужумкор футболчиларимиздан қанотда фойдаландик. Чунки қанотда ўйнайдиган асл футболчимизнинг бирида жароҳат, яна бирида сариқ карточкалари бор эди. Бу қийин ҳолатга солиб қўйди. Барибир қийин вазиятдан чиқиб кетдик.

- “Машъал” 1-ўринга чиқиб олди. “Хоразм” эса охирги ўринлардан бирида. Бу учрашувда “Машъал” ҳисобни сақлаб қолиш учун ўйнади, “Хоразм” эса ҳужумлар уюштирди...

- “Хоразм”ни 4 та ўйинини кўриб чиқдик. Ўйин жараёнида жамоа жуда ишонч билан ўйнаяпти. Аммо“Дўстлик” билан учрашувда осон бўлади, деб кутишган, бироқ ўзларини ўнглаб олмаганлар. Бугун биз шу хатони қилмаслигимиз керак эди. Уларни таркибида бизни чақириғимизни қабул қилмаган бир нечта футболчилар бор.