Улуғбек Бақоев: “Навбаҳор” бу йил медаллар учун курашади. Кубокда эса финалгача бора олади

Coca Cola Суперлига 7-туридан ўрин олган “Навбаҳор” – “Сўғдиёна” (2:0) учрашувидан кейинги матбуот анжуманининг биринчи қисмида жиззахликлар бош мураббийи Улуғбек Бақоев иштирок этиб, ўйин ҳақида ўз фикрларини билдирди. Бу ҳақда "Навбаҳор" клуби матбуот хизмати хабар берди.

- Ўйин борасида тўхталадиган бўлсам, учрашув икки сериядан иборат бўлди, дейиш мумкин. Биринчи бўлимда ўз имкониятларимиздан фойдалана олмадик, иккинчи таймда эса рақиб хатоларимиздан фойдаланган ҳолда, ғалаба қозонди. Нимаям дердим, футболда хатолар ҳам бўлиб туради. Бугунги ютуқ билан “Навбаҳор”ни табриклайман ва жамоага кейинги баҳсларда ҳам омад ёр бўлишини тилайман.

Менимча, жамоамиз футболчиларнинг савияси, маҳорати ёки омадсизлик туфайли мағлубиятга учрамади. Шунчаки, мезбонлар юзага келган имкониятлардан самарали тарзда фойдалана олишди, шогирдларим эса буни амалга ошира олишмади. Футбол хатолардан иборат ўйин. Ким хатоларга йўл қўйса, ютқазади, ким гол урса, ғалаба қозонади.

Йигитларга эътирозим йўқ, улар ҳаракат қилишди, шунчаки гол уришолмади. Бу футбол. Футболда эса доимо ғалаба қозона олмайсан. Албатта, натижадан қониқмадим, жамоамиз майдонга ғалаба иштиёқида тушганди. Йигитларнинг ўйинларидан қониқиш ҳосил қилдим, лекин натижадан эмас. “Сўғдиёна” Наманганда ҳеч қачон юта олмаганлигини тўғриси, билмагандим.

Шахсий фикримча, “Навбаҳор” жорий мавсумда медаллар учун кураш олиб боради. Ўзбекистон кубогида эса финалгача бора олади. Жамоа сафида яхши футболчилар жамланган ва Наманганда буюк мураббий фаолият юритмоқда, - деди Улуғбек Бақоев.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Muhammad Rahmatillaev
03/07/2020 13:56
Улуғбек жуда тўғри гапни айтди Навбахорга омад ёр бўлсин.