Умид қилманг, Мбаппе ва Холанд трансфери амалга ошмайди!

“Арсенал” ва “Манчестер Сити”нинг собиқ ҳимоячиси Бакари Санья замонавий футболнинг энг ёрқин тўпурарлари Килиан Мбаппе ва Эрлинг Холанд ҳозирда фаолият юритаётган жамоаларини ўзгартирмаслигини таъкидлади.

Сўнгги ойларда Европа нашрлари ва экспертлари Мадриднинг “Реал” клуби янги “Галактикос”  даври доирасида Мбаппе ва Холандни бирлаштириш ғоясини амалга оширмоқчи эканини  муҳокама қилмоқда.

Яқинда Oddspedia нашрига берган интервьюсида Бакари Санья франциялик ҳужумчи Килиан Мбаппенинг “Реал”ни тарк этиши ва Эрлинг Холанднинг кейинчалик “Сантьяго Бернабеу”га ўтиш имконияти йўқлигини таъкидлади.

- Бу трансферлар содир бўлмайди. Килиан Мадридда жуда бахтиёр ва бор эътиборини “Реал”га қаратган. Мбаппе “Қироллик клуби”да энг муҳим совринларни ютишга ва чуқур из қолдиришга қатъий қарор қилган. Мадрид клуби учун ўйнаш унинг орзуси эди, шунинг учун у ҳеч қандай шароитда ҳам “Реал”дан кетмайди.

Эрлинг Холанд ҳам “Манчестер Сити”да жуда бахтиёр кўринади ва Англияда яшашни ёқтиради. “Реал” , шубҳасиз, жуда жозибали вариант, лекин норвегиялик тўпурар айни пайтда дунёнинг энг зўр лигасида ўйнайди ва “Манчестер Сити” ҳамда Пеп Гвардиоланинг тўлиқ ҳурматига эга. У яқин орада жамоани тарк этмоқчи эмас, - деди Бакари Санья.