"Унинг тактикасини бошқа мураббийларда кўрмадим, клубдаги дўстларим ҳаяжон билан кутдилар" - Йўлдошев яна Кержаков билан бирга!

Қозоғистоннинг “Қайрат” сафида тўп суриб келаётган ҳамюртимиз Иброҳимхалил Йўлдошев яна ўзи учун қадрли бўлган мураббий билан ишлайдиган бўлди.

Гап шундаки, яқинда “Қайрат” жамоасида бош мураббий ўзгарди. Энди бу клубга россиялик таниқли шахс – Александр Кержаков бош мураббийлик қилади. Билсангиз керак, у Россиянинг “Нижний Новгород” клубини бошқарганида айнан Йўлдошевни ўз жамоасига таклиф қилган ва биргаликда самарали иш олиб борганлар.

Энди уларнинг йўлласи яна кесишди. Sports.uz журналисти эса Иброҳимхалил билан суҳбатлашди.

- Яқинда “Қайрат” сафида гол урдингиз ва бу чиройли чиқди. Ҳимоячининг гол уриши футболчига бошқача завқ бағишласа керак-а?

- Албатта. Менимча, футболда ҳар қайси амплуасидаги ўйинчи учун гол уриш бошқача завқ берса керак, хусусан ҳимояда ўйнайдиган мен каби ўйинчиларга ҳам. “Қайрат”да гол уриш ниятим амалга ошди, Худога шукр. Шу кунгача ўйнаган ҳар бир клубимда гол уришга муваффақ бўлдим.

- “Қайрат”га Александр Кержаков бош мураббий этиб тайинланди. Сиз илк бор қачон эшитдингиз ва келишидан аввал гаплашдингларми? Масалан, клуб ҳақида қизиқиб сўрадими?

- Александр Кержаков келишини клубда 1-2 ҳафта олдин эшитдик. Лекин у билан келишидан олдин  гаплашмагандик. Келганидан кейин албатта иккимиз ҳам  хурсанд бўлиб суҳбатлашдик.

- Олдин Кержаков билан ишлагансиз ва сизга доим ишонч билдирган. “Нижний Новгород”га ҳам ўзи таклиф қилган. Шундай экан, у ҳақида нима дея оласиз? “Қайрат”да уни нима кутяпти, деб ўйлайсиз?

- Мен мураббийим учун жуда хурсанд бўлдим, албатта клубим учун ҳам. Чунки Александр Кержаковни самарали мураббий деб биламан. Унинг тактикасини бошқа мураббийларимда кўрмадим. Албатта, клубимга ҳам, Александр Кержаковга ҳам омад тилайман. Худо хоҳласа, бирга чемпионликни қўлга киритиш насиб қилсин.

-  Қозоғистон чемпионатида сизни нимадир ҳайрон қолдирмадими?

- Қозоғистон чемпионатида мени хайрон қолдирган нарса бу иштиёқ. Бу ерда футболчилар пул учун эмас, балки самарали футбол учун ўйнашади.

- Жамоангиз янги мураббийни қандай кутиб олди?

- Клубдаги дўстларим ҳаяжон билан кутдилар. Мендан ҳам қандай мураббий деб сўрадилар. Келганидан сўнг илиқ кутиб олинди. Биринчи машғулотданоқ ҳамма билдики, унинг тактикаси ва машғулотлари бошқа мураббийлардан анча фарқ қилади.

- Кержаков билан янги клубда илк бор нимани гаплашдинглар?

- Кержаков ва унинг ёрдамчилари билан илиқ суҳбатлашдик. Хол-аҳвол сўрадик, гол урганим учун хурсанд бўлганини айтди ва бу клубда ҳам яна бирга кўп натижаларга эришишимзга ишонч билдирди.

- Фаолиятингизга боғлик кейинги режалар кандай?

- Ҳозирчи фаолиятим ҳақида бир гап айта олмайман. Олдинда Тошкентда олимпия терма жамоаси билан йиғин, кейин эса клубимга қайтиб чемпионлик учун кураш ва албатта Париж Олимпиадасида натижага эришиш мақсадим бор. Шу ҳақида ўйлаяпман.

Шуҳратбек Жўраев.