Vadim Abramov: "Bu savol menga bo‘lmasa kerak"

"Metallurg" - "Dinamo" (0:1) uchrashuvidan keyingi matbuot anjumanida mehmonlar bosh murabbiyi Vadim Abramov o‘yin borasidagi fikrlari bilan o‘rtoqlashdi.

- Tabrik uchun rahmat! G‘alati vaziyat, o‘z-o‘zimizga muammolar yaratyapmiz. Birinchi bo‘limda yomon o‘ynamadik va hisobda ustunlik bilan chiqdik. Ikkinchi bo‘limda faqat to‘g‘ri o‘ynashimiz kifoya edi. Biroq biz o‘zimizga muammo yaratdik va vaziyatni qiyinlashtirdik. Yakunda qahramonlarga o‘xshab, g‘alabani kurashib saqlab qoldik. Shunga qaramay, yigitlarga oxirigacha kurashgani uchun rahmat deyman.

- Birinchi davradagi o‘yinda ham chetlatish kuzatilgan va “Dinamo” kambek qilib, g‘alabani ilib ketgandi...

- Ha, o‘sha o‘yinga o‘xshab ketdi. Bugun qanday jamoaga qarshi to‘p surayotganimizni bilardik va qiyin g‘alabaga erishdik.

- Ravshan Yagudinning oddiy vaziyatda qizil kartochka olib maydonni tark etishi tushunarsiz va futbolda unikal hodisa bo‘ldi...

- Bilmadim, hakamdan so‘raganimda u “darvozabon to‘pni darhol tepib yuborganida sariq kartochka bo‘lardi, ammo u hujumchi kelishini kutdi va keyin to‘pni tepib yubordi”, dedi. Ehtimol, u to‘pni darhol tepib yuborganida hech kim bu vaziyatga e’tibor qaratmasdi, balki. Ochig‘i, vaziyatni bir ko‘rishda uncha tushunmadim, bu men uchun tushunarsiz bo‘ldi. Yangi qoidalar ko‘payib ketgandek... Yaxshiyamki, o‘sha vaziyatda penalti belgilanmadi. Vaziyat qanday talqin qilinayotgani tushunarli emas.

- O‘yindan bir kun avval «Dinamo»ga ushbu maydonda mashg‘ulot o‘tkazishga ruxsat berilmagani bugungi uchrashuvga qay daraja ta’sir qildi?

- Bu holat avvalo, bizga nisbatan chiroyli munosabat emas. Negadir biz bilan shunday ishlar kuzatilyapti. Avvalgi safar o‘yinida “Neftchi” bilan bahs oldidan Farg‘onada mashg‘ulot o‘tashimiz uchun maydon chimi o‘rilmagan, yomon holatda edi. Endi esa o‘yindan bir kun avval uchrashuv o‘tadigan maydonga mashg‘ulot o‘tkazishga qo‘yishmadi. Reglament bor, ammo negadir uni boshqalar buza olayapti... Ochig‘i, bilmadim, bu savol menga bo‘lmasa kerak, shunchaki bu chiroyli holat emas.