Учрашувда «Бунёдкор»нинг янги мавсумга тайёргарлик доирасида ўтказилган йиғинлар, мавсум олдида клуб олдга қўйилаётган вазифалар, режалар ҳақида сўз юритилди.

Жумладан "қалдирғочлар" бош мураббийи Вадим Абрамов жамоа янги мавсумда асосан ёш футболчиларга эътибор қаратишини айтиб ўтди, дея хабар бермоқда клуб матбуот хизмати.

"Жамоага янги танланганимда клубнинг мақсади ёш футболчиларга эътибор қаратиш ва уларга кўпроқ имконият яратиб бериш лозимлиги айтилган эди. Ўтган давр мобайнида бир қатор ўртоқлик ўйинлари ўтказдик ҳамда эътиборимизни клуб тарбияланувчиларига қаратдик.

Бугунги таркибга эътибор берсангиз, кўпчилиги «Бунёдкор» академияси тарбияланувчилари, айримлари ўтган мавсумда ўринбосарлар таркибида ўйнаган ва ҳали катта футболдан нафас олмаган футболчилар ҳисобланади. Мураббийлар штаби янги мавсумда ушбу футболчилар билан чиройли ўйин кўрсатиб, мухлисларни хурсанд қилишга, раҳбарият ҳамда ҳомийлар ишончини оқлашга ҳаракат қиламиз", - деди Абрамов.