Вадим Абрамов: "Ўзимиз ўйинни рақибга топшириб қўйдик"

“Андижон” – “Динамо” (2:1) ўртасидаги ўйиндан кейинги матбуот анжуманида дастлаб меҳмонлар устози Вадим Абрамов қатнашди.

- Ўйин ҳақида нима дейишим мумкин? Барча ўйинни кўрди. Кичик ҳисобда мағлубиятга учрадик. Тўғриси, учрашув ҳақида ҳеч нарса айта олмайман. Бундай ҳолат биринчи марта рўй бераётгани йўқ. Хатолар туфайли гол ўтказиб юборяпмиз ва мағлубиятга учраяпмиз.

- “Динамо” гол ургач, вақтни чўза бошлади. Оқибатда бирин-кетин иккита гол ўтказиб юборди.

- Юқорида айтганимдек, қўпол хатоларга йўл қўйяпмиз ва шунинг натижасида гол ўтказиб мағлубиятга учраяпмиз. Жамоада қандайдир ишончсизлик пайдо бўлган. Гол урдик, лекин ундан кейин дарвозамиздан тўплар олиб чиқдик. Ўзимиз ўйинни рақибга топшириб қўйдик. Сиз ҳақсиз. Бундай ҳолатда ўйин ҳақида қандай изоҳ бериш мумкин?

- Жамоангиз охирги 15 дақиқада мувозанатни йўқотиб қўйди. Бунинг сабаби нимада?

- Фикр билдириш қийин. Балки жисмоний ҳолатимиз яхши эмасдир. Албатта, бу толиқишлар билан боғлиқ бўлиши мумкин. Марказий ҳимоячиларимиз бир неча бор хатоларга йўл қўйишди. Яхши ўйнадик, аммо “Андижон”ни дарвозамизга биринчи зарбаси гол билан якунланди.

- Майдон чими ўсиб кетганига нима дейсиз? Бу мағлубиятга таъсир қилдими?

- Мағлубиятга учрадик. Энди бу ҳақида гапиришга ҳожат йўқ. Балки шундайдир, аммо рақиб ҳам шу майдонда ўйнади. Ёмон ўйнамадик, бироқ хатоларга йўл қўйдик ва мағлубиятга учрадик. Албатта, аламли бўлди. Гол урганимиздан кейин яна тўп киритишимиз мумкин эди. Эътиборлиси, “Андижон” биздан кучли ўйнамади. Лекин улар ғалаба қозонишди.

- Анвар Ҳожимирзаевни ўзини тутиши сизга ғалати туюлмадими? У агрессив ўйнади, рақиб билан тортишиб юрди ва якунда қизил карточа олди. Ўтган турда эса Салим Мустафоев четлатилганди.

- Ўйинчиларни тўғри тушунаман. Анчадан бери ойлик маош олмагандан кейин ҳар хил руҳий ҳолатлар юз беради. Муаммоларимиз етарлича бор. Футболчиларни айблаш ҳам қийин. Кимдир кетмоқчи, яна бошқаси бошқа фикрда.

- Хислат Ҳалилов ва бразилиялик легионер клубдан кетишдими?

- Нима дейишим мумкин? Улар келишди, қарашди, жамоада ойлик берилмаяпти. Шу сабаб улар ўйнамайдиган бўлишди. Пул йўқ бўлса, биз нима қила оламиз? У кетди ва менимча, ФИФАга мурожаат қилса керак. Хислат Ҳалилов олдимга келди ва кетишини айтди. Нима ҳам қила олардим, розилик бердим. Хоҳламаган ўйинчини мажбурлаб ўйнатиб бўлмайди. Шу боис ҳеч қандай эътироз билдирмадим. Жамоада фақат ўзини эмас, бутун жамоани ўйлаш керак.