Vadim Abramov terma jamoaning o‘zgartirib bo‘lmas o‘yinchisi kimligini aytdi

Futbol bo‘yicha O‘zbekiston milliy terma jamoasi bosh murabbiyi Vadim Abramov “Futbol plyus”ga bergan intervyusida qaysi futbolchi jamoa uchun muhim ekanini aytib o‘tdi.

Bosh murabbiy har bir jamoada o‘zining etakchi futbolchisi bo‘lishini, milliy termada bu vazifani Odil Ahmedov bajarayotganini alohida ta’kidladi.

- Etakchisi bor jamoa – yaxshi jamoa. Bizning terma jamoada shunday o‘yinchi Odil Ahmedov, deb hisoblayman. U biz uchun o‘ta muhim futbolchi.  Uning maydonda borligi yosh futbolchilarning o‘ziga bo‘lgan ishonchini his qilishiga yordam beradi, - dedi Abramov.

Shuningdek, bosh murabbiy terma jamoa kiyim almashtirish xonasida barcha mas’uliyat o‘zining  zimmasida ekanini tan oldi va bu borada Odil Ahmedovning yordamiga ehtiyoj yo‘qligini bildirdi.

Vadim Abramov ikkinchi marotaba milliy jamoaga ustozlik qilyapti. Dastlab, 2010-2012 yillar mamlakatimiz bosh jamoasini boshqargan mutaxassis 2019 yilda yana bosh murabbiylikka qaytarildi.

Odil Ahmedov esa O‘zbekiston milliy terma jamoasida 2007 yildan buyon to‘p surmoqda. U jami 105 uchrashuv o‘tkazib, raqiblar darvozasini 20 marta aniq nishonga olgan.