Вадим Абрамов: "Тўрт ойдан бери маош олмаяпмиз, бу албатта оғир" (матбуот анжумани)

Вадим Абрамов "Бунёдкор" устидан қозонилган ғалабадан сўнг матбуот анжуманида ўз фикрлари билан ўртоқлашди.

"Биринчи бўлимда биз олдинга югурдик, омад ҳам келди, гол урдик. Иккита гол урдик, яна кўпроқ гол уриш имконияти ҳам бор эди ва аслида ўйинни биринчи бўлимнинг ўзидаёқ ҳал қилишимиз мумкин эди. Лекин афсуски, иккинчи бўлимда унчалик яхши ўйнай олмадик. Гол ўтказиб юборганимиздан кейин ўйин умуман жуда асабий, "валидолли" тус олди. Омадимиз келиб ғалаба қозондик. Шунинг учун "Бунёдкор"га кейинги ўйинларда омад тилаймиз.

Биз эса жиддий тайёргарлик кўришимиз керак. Чунки иккинчи бўлимдагидек ўйин билан албатта муаммолар бўлади".

— Иккинчи бўлимда нима бўлди? Ташаббусни рақиб қўлга олдими ёки "Бунёдкор"га бироз чекиниб, натижани ушлаб туришга имкон бердингизларми?

— Йўқ, бундай топшириқ бўлмаган. Бу ерда алмаштиришлар омадсиз чиқди. Шунинг учун бу менинг айбим. Алмаштиришларда адашдик. Майдонга тушган футболчилар бироз бошқачароқ ўйнаши керак эди. Шу сабабли майдон марказида тўғри ўйнай олмадик ва барча муаммолар шу ердан бошланди.

— Бугун сиз ўтган йилги темпингизга қайтгандек кўриндингиз. Энди биринчи тур натижаси тасодиф бўлган, деб айтиш мумкинми?

— Йўқ, мен бу ҳақда аввал ҳам айтганман. Албатта, бундай натижани кўпчилик кутмаган эди. Ўша ўйинда ҳам яхши бошлагандик, лекин кераксиз пенальти бўлди. Кейин стандартдан иккинчи голни ўтказиб юбордик. Шундан кейин шошилиб, нотўғри ўйнай бошладик ва гол ура олмадик. Муаммо реализацияда бўлди. Бугун ҳам кўриб турибсиз, биринчи бўлимда вазиятлар кўп эди, лекин улардан фойдаланиш оқсади.

Бу, эҳтимол, мавсумнинг дастлабки икки турида футболчилар ҳали тўлиқ формага кирмагани билан ҳам боғлиқ. Бундан ташқари, ҳозир қайси ой эканини тушунасизлар. Кўпчилик рўза тутяпти, бу ҳам ўз таъсирини ўтказиши табиий.

— Бу позицияда жамоада рақобат катта. Сиз Амонов ҳақида сўраяпсизми?
— Йўқ, у жароҳат олгани учун биринчи бўлимдан кейин алмаштирилди.

— Азизбек Амонов ўтган йил мавсумнинг биринчи қисмида ҳам Кубок ўйинларида қатнашганди. Бугун у яхши ўйнади, аммо бир нечта жуда қулай вазиятларни ҳам йўққа чиқарди. Сизга у бироз ортиқча ўзбошимчалик қилгандек туюлмадими?
— Йўқ, мен унга шунчаки айрим вазиятларда тўпни шерикларига узатиши мумкинлигини айтдим. У баъзи пайтларда ўзига ортиқча ишонч билан тўпни ўзи олиб кетди, ҳолбуки пас бериш мумкин эди.

Аслида у "Бунёдкор"га қарши омадли ўйнайди. Афсуски, мавсум давомида улар билан фақат икки марта ўйнаймиз. Агар ҳар сафар шундай гол уриб турса, жуда яхши бўларди. У фойдали футболчи, катта маҳорат эгаси. Ундан яна катта ёрдам кутиб қоламиз.

Менимча, унинг кайфияти жуда яхши эди. Агар ҳар бир ўйинга шундай тайёргарлик билан чиқса, самарадорлиги янада ошади.

— Сиз жамоада реализация муаммоси борлигини айтдингиз. Лекин биз бошқа муаммолар ҳам борлигини эшитдик. Айтишларича, жамоада молиявий барқарорлик билан боғлиқ қийинчиликлар бор, футболчилар маош олмаяпти. Шундай шароитда чемпионлик учун қандай курашиш мумкин? Қандай қилиб футболчиларни руҳлантирасиз?

— Албатта, сиз айтган гапларнинг барчаси тўғри. Ҳар бир футболчининг оиласи бор. Тўрт ойдан бери маош олмаслик — албатта, оғир масала. Мен уларни тушунаман. Ҳар куни улар билан гаплашаман. Бу ҳолат жамоага таъсир қилмаслигига умид қиламиз. Раҳбарият бу муаммони ҳал қилади, деб ўйлайман. Умид охирги бўлиб ўлади.