Вальверде яна можаро марказида: "Тчуамени билан жанжал ҳақида янги тафсилотлар очиқланди"

Журналист Рауль Варела Федерико Вальверде иштирокидаги яна бир можаро ҳақида маълумот берди.

Аввалроқ "Реал" ярим ҳимоячиси машғулот вақтида Орельен Тчуамени билан муштлашиб кетгани ва шундан сўнг шифохонага олиб кетилгани ҳақида хабарлар тарқалган эди. Айтилишича, икки футболчи ўртасидаги кескинлик машғулот давомидаёқ бошланган.

"La Tribu" дастури бошловчиси ва директори Вареланинг таъкидлашича, бундай ҳолат аввал ҳам кузатилган. Унинг айтишича, ўтган йил апрель ойида "Алавес"га қарши баҳсдан кейин ҳам Вальверде кийиниш хонасида жамоадошларидан бири билан жанжаллашган. Ўша учрашувда "Реал" 2:1 ҳисобида ғалаба қозонган эди.

"Вальверде билан нима бўлаётганини билмайман ва буни катта муаммога айлантирмоқчи эмасман. Аммо ҳақиқат шуки, у Хаби Алонсога ўзини қанот ҳимоясида ўйнашни истамаётганини айтган, ваҳоланки у жамоа сардори ҳисобланади.

“Алавес”га қарши ўйиндан кейин у бир жамоадошининг хатти-ҳаракатларини танқид қилиб, у билан тортишиб қолган. Кейин эса бошқа бир футболчини ҳам огоҳлантирган. Кеча эса Тчуамени билан жанжаллашди. Сен “Реал” сардорисан. Агар ўзингни босолмасанг, қандай лидерсан?" — деди Варела.