Ван Дейк: "Биз Трентнинг қарорини ҳурмат қилмоқдамиз, лекин уни соғинамиз"

"Ливерпуль" сардори Виржил ван Дейк "Арсенал"га қарши 36-тур ўйинида (2:2) захирадан майдонга тушган Трент Александер-Арнольдни айрим мухлислар қарсаклар билан кутиб олганига муносабат билдирди. Эслатиб ўтамиз, Трент мавсум якунлангач жамоани тарк этишини маълум қилган эди.

— Менимча, мураббий матбуот анжуманида тўғри гапни айтди – инсон ўзи ва оиласи учун қабул қилган қарорга бошқалар қандай муносабатда бўлишини белгилай олмайсиз. Реакция бўлди, у буни қабул қилиши керак. Биз жамоа сифатида ҳам бунга кўникишимиз керак. Балки, у бундай муносабатни кутгандир. Олдимизда яна икки ўйин бор, сўнг у кетади.

Мен шахсан ҳеч қандай реакцияни кутмаган эдим. Бу осон эмас. Биз уни қўллаб-қувватлаймиз. У келаси йил биз билан бўлмаслигидан жуда афсусдамиз, чунки у фантастик футболчи. Мен бу ерда етти йил бўлганман ва шунча вақт ичида у ўзининг ажойиб, бетакрор салоҳиятини намоён қилди. У кетганда албатта уни соғинамиз.

Бу ҳолат чемпионликни нишонлашга халал бермаслиги керак. Жамоамизда бошқа футболчилар ҳам бор, улар ҳам бундай кунда шарафланишга ҳақли. Трент бу қарорни қабул қилди ва буни англаган. Олдимизда яна икки ўйини бор, у албатта майдонга тушади. Чунки у фантастик футболчи. Кейин эса унга хайрлашамиз, – деди мерсесайдликлар сардори "TNT Sports"га.