Василий Ломаченко-Девин Хэйни жангида ким ғалаба қозонади? (Сўровнома 2-қисм)

20 май куни профессионал бокс оламида яна бир супер жангнинг гувоҳига айланамиз. Енгил вазн (61,2 кг) вазн тоифасидаги мутлақ чемпион Девин Хейни чемпионлик камарларини  украиналик собиқ чемпион Василий Ломаченкода ҳимоя қилади.  Биз ушбу жанг борасида ўзбекистонлик бокс олами вакилларининг фикри билан қизиқиб, унинг 1-қисмини эътиборингизга ҳавола этгандик. Энди, 2-қисмини тақдим этамиз.

Акром Шадиходжаев – Lift промоутерлик компанияси мутасаддиси

- Қизиқарли жанг бўлади. Бу Ломаченко учун сўнги имконият бўлиши мумкин. Шунинг учун у тиш-тирноғигача қаршилик кўрсатади. Умуман олганда имкониятларни тенг дея баҳолаган бўлардим.

Алишер Тўйчиев – мураббий

- Василий Ломаченко бокс оламида жуда катта ном саналади. У ўша Теофимо Лопесдан учралган мағлубиятдан кейин керакли хулосани чиқара олган. Хэйни ҳам мутлақ чемпион ва жуда яхши боксчи ҳисобланади. Қайсидир жиҳатдан Ломаченкога ноқулай рақиб деб ўйлайман. Шундай бўлса-да Ломага мухлислик қиламиз ва у ғалаба қозонади, деган фикрдаман.

Баҳодир Эркаев –мураббий

- Василий Ломаченконинг жангларида ҳар доим завқ олганмиз. У ҳаваскор боксда ҳам мукаммал жангчи бўлган. Профессионалда ҳам ажойиб натижаларни қайд этди. Энди ёш ўз таъсирини ўтказмаса, у Хэйнини мағлуб этишга қодир. Бироқ, барчаси тайёргарлик қандай бўлганлигига боғлиқ. Албатта, Ломаченкога мухлислик қиламан ва у ғалаба қозонса керак, деб ўйлайман.

Абдурасул Исмоилов – боксчи

- Бу жанг енгил вазн тоифасидаги энг кучли ва муҳим тўқнашув. Ломаченкони ҳаммамиз яхши биламизки тезлиги, оёқ ҳаракатлари жуда юқори даражада, лекин бу ерда ёш фактори бор. Хэйни эса ёш ва кучга тўлган вақти, бир сўз билан айтганда энг юқори жисмоний ҳолатга эга. Шундай бўлса-да бу ерда кимнидир устун дейиш қийин. Имкониятларни 50/50 деган бўлардим. Аммо жангда Ломага мухлислик қиламан.

Муҳаммадсалим Сотволдиев – боксчи

- Менимча бу жангга бўлган қизиқиш бутунжаҳонда юқори бўлса керак. Биз Ломаченконинг жангларига ҳавас қилганмиз ва унга мухлислик қиламиз. Ломаченконинг ёши бироз ўтган бўлиши мумкин. Бироқ, у боксда уддалаб бўлмас ишни ҳам амалга ошириши мумкиндек таассурот уйғотади. Хэйнига гап-сўз бўлиши мумкинмас. У енгил вазнда яққол доминант дейишим мукин. Аммо, Лома барибир жиддий рақиб бўлади. Имкониятларни 50/50 деган бўлардим.