Вазир Халқаро оғир атлетика федерацияси раҳбари бошчилигидаги делегация билан учрашди

Хабар берганимиздек, жорий йилнинг 15-25 июль кунлари пойтахтимиздаги “Юнусобод” спорт мажмуасида оғир атлетика бўйича ўсмирлар ва ёшлар ўртасидаги Осиё чемпионати бўлиб ўтади.

Шу муносабат билан оғир атлетика спорти бўйича фахрий меҳмонлар юртимизда бўлиб туришибди. Бугун Халқаро оғир атлетика федерацияси президенти Муҳаммад Ҳасан Жалуд (Ироқ) ҳамда Осиё оғир атлетика федерацияси президенти Ал-Мана Муҳаммад Юсуф (Қатар) Спортни ривожлантириш вазирлигига ташриф буюришди. Бу ҳақда вазирлик матбуот хизмати хабар бермоқда.

Меҳмонларни Спортни ривожлантириш вазири Адхам Икрамов ҳамда вазир ўринбосари, Ўзбекистон оғир атлетика федерацияси раисининг биринчи ўринбосари Шахрулло Махмудов кутиб олди. Учрашувда меҳмонлар оғир атлетика бўйича ўсмирлар ва ёшлар ўртасидаги Осиё чемпионати баҳсларини юқори савияда ўтказиш учун барча ишлар амалга оширилганлигини алоҳида эътироф этишди.

Шунингдек, икки томонлама ҳамкорлик алоқаларини янада мустаҳкамлаш масалалари ҳам муҳокама қилинди.

Маълумот учун: ушбу мусобақада қитъамизнинг 22 та давлатидан жами 400 нафардан зиёд атлетлар медаллар учун баҳс олиб боришади. Унда Ўзбекистон ўсмирлар ва ёшлар терма жамоасининг 30 нафарга яқин аъзоси Ватанимиз шарафини ҳимоя қилиши кутилмоқда.

Эслатиб ўтамиз, ўсмирлар ва ёшлар ўртасидаги қитъа чемпионати доирасида 16-июл куни Осиё оғир атлетика федерациясининг навбатдаги Конгресси, шунингдек, турли комиссияларнинг йиғилишлари ҳам ўтказилади. Мусобақанинг тантанали очилиш маросими эса 17-июлга белгиланган.