Венгер: "48 жамоалик Жаҳон чемпионати футболни янада глобал қилади"

"Арсенал"нинг собиқ бош мураббийи Арсен Венгер жаҳон чемпионати иштирокчилари сони 48 та жамоагача кенгайтирилиши ҳақида фикр билдирди.

"Терма жамоанг учун ўйнаш — ўзига хос туйғу. Бир томондан, сен ўз мамлакатинг ғурурини ифода қиласан, иккинчи томондан эса улкан босимни ҳис қиласан: ютқазишдан қўрқиш, мухлисларни хафа қилиш, кутилган даражада ўйнай олмаслик хавфи.

Бутун бир миллат олдида жавобгарликни ўз зиммасига олиш учун жуда катта руҳий куч талаб этилади. Кучли терма жамоаларга ана шундай босимга дош бера оладиган, янги авлодни ифода этувчи футболчилар керак.

Узоқ йиллар давомида жаҳон чемпионати асосан Европа ва Жанубий Америкага йўналтирилган мусобақа бўлиб келди. Уни кўпроқ мамлакатлар, айниқса Африка ва Осиё учун очиш зарур эди. Футбол глобал спортга айланди: одамлар қаерга бормасин, футбол ҳақида гапиради. Агар келажакка назар ташласак, юз йилдан кейин ҳар бир инсон ҳеч бўлмаганда жаҳон чемпионатини ютишни орзу қилиш имконига эга бўлиши керак. 32 жамоадан 48 жамоага ўтиш шу йўлдаги муҳим қадам бўлди.

Жаҳон чемпионатининг илк икки ҳафтаси доим энг гўзал давр ҳисобланади. Бу ерда бутун дунё жамланади, ҳар ким ўз мамлакатини ифода этаётганидан фахрланади ва бир вақтнинг ўзида умумий бирлик ҳисси пайдо бўлади. Бу — жамоавий байрам.

104 та ўйиндан иборат ва анча узоқ давом этадиган жаҳон чемпионати руҳий жиҳатдан катта синов бўлади. Ғалаба қозониш учун жиддий психологик тайёргарлик талаб этилади. Мураббийлар штаби жамоа бирлигини ва мотивациясини бир неча ҳафта давомида сақлаб туриши керак бўлади. Плей-офф босқичларида пенальтилар деярли муқаррар, бу ерда ҳам руҳий омил ҳал қилувчи аҳамият касб этади", — деди Венгер Давосда ўтган Жаҳон иқтисодий форумида.