Виктор Тишенко: Абрамов топ-мураббий, у мени олдин ҳам терма жамоага чақирган

Ўзбекистон миллий терма жамоаси айни чоғда Дубайда навбатдаги ўқув-машғулот йиғинини олиб бораётганидан яхши хабардорсиз. Шу билан бирга терма жамоамизнинг мураббийлар штабида ҳам ўзгаришлар юз бергани хусусида ЎФА матбуот хизмати расмий хабар берди.

2018 ва 2019 йиллар давомида терма жамоамизни бошқарган Эктор Куперга жисмоний тайёргарлик бўйича мураббий сифатида ёрдамлашган Антонио Сариоглуни мухлисларимиз яхши билишса керак. Ушбу мутахассис яна қайтарилди. Бундан ташқари, Тимур Кападзенинг ўрнига россиялик Виктор Григорьевич Тишенко таклиф қилинди.

Сариоглудан фарқли ўлароқ, Тишенкони балки кўплаб ишқибозларимиз яқиндан билмасликлари мумкин. Виктор Григорьевич 1949 йилнинг 22 февраль санасида таваллуд топган. Демак, бир неча кундан кейин у 72 ёшни қарши олади. Мазкур мутахассисни футбол мухлисларининг кекса авлод вакиллари эсласалар ажаб эмас.

Тишенко футболчилик пайтида ҳимоячи сифатида тўп сурган ва асосан Россия клубларида фаолият кўрсатган. Мураббийлик фаолиятини 1980 йилда Қозоғистоннинг “Актобе” жамоасида бошлаган. Шунингдек, Виктор Григорьевич собиқ Иттифоқ даврида “Нефтчи”да ҳам ишлаган. Қолаверса, Зарафшон ва Хоразмдаги клубларда ҳам фаолият кўрсатган. Кейинчалик Россияга қайтиб “Торпедо”, “Колос”, “Лада”, “Черноморец”, “Сочи-04” сингари жамоаларда мураббийлик қилди.

Шуни ҳам таъкидлаш керакки, Виктор Григорьевич таниқли мутахассис Юрий Сёмин билан ҳам елкама-елка ишлаган. Жумладан, Сёмин Киевнинг “Динамо” ҳамда Москванинг “Локомотив” клубларини бошқарган чоғида Тишенко ҳам мураббийлар штабида бўлган.

Умуман олганда, Россия клубларида меҳнат қилган ҳолда катта тажриба тўплаган. Sports.uz мухбири эса миллий терма жамоамизнинг янги мураббийи билан алоқа ўрнатди. Биринчи навбатда Тишенкодан бунгача фаолияти қандай кечгани тўғрисида сўраганимизда шундай жавоб берди:  

- Гапингиз рост, шу пайтгача асосан рус клубларида ишладим. Албатта, “Локомотив”да Юрий Сёмин билан бирга ишлаганим ҳам рост. Мен спорт директори ва селекцион таҳлилий департаментнинг раҳбари сифатида ишлаганман. Охирги тўрт йил ичида эса асосий таркибда селекция бўйича бош мураббий вазифасини бажарганман. “Динамо”да эса селекцион таҳлилий департаментни бошқардим.

Кўриб турганингиздек, Виктор Тишенко айниқса, Москванинг “Локомотив” клубида бир неча мавсум давомида фаолият кўрсатган ҳолда Сёминга яқиндан кўмаклашган. Табиийки, у кўпни кўрган мутахассис. Шундай экан, унинг миллий терма жамоамизда иш бошлагани ҳам бежиз эмас. Бевосита ундан терма жамоамизда иш бошлаши қандай юз бергани ҳамда Вадим Абрамов ҳақидаги фикрларини ҳам сўрадик.

- Ўзбекистон миллий терма жамоасини бошқараётган Вадим Абрамов топ-мақомдаги мураббий. Уни анчадан бери биламан! Албатта, терма жамоангиз иштирокидаги ўйинларни кузатиб келганман. Абрамов мени анчадан бери чақириб келарди. У терма жамоага илк бор устозлик қилганда ҳам мени ўз ёнига чорлаган. Бироқ ўшанда “Локомотив” ва “Динамо” Киев клубларидаги ишлар билан боғлиқ эдим, деди - Тишенко.

Терма жамоамизнинг янги мураббийини футболимиздан хабари борлиги кўриниб турибди. Шунингдек, у ўзининг устози кимлигини ва футболчиларимиздан кимларни яхши билишини ҳам қўшимча қилди.   

- Мен узоқ вақт Евгений Борисович Валицкий билан бирга ишлаганман. У менинг устозим ҳисобланади. Футболчиларингизга келсак, Одил Аҳмедов, Элдор Шомуродов ҳамда Остон Ўрунов каби ўйинчиларни яхши биламан. Уларни айниқса, Россиядаги фаолиятлари орқали яхши танийман, - дея фикр билдирди, Виктор Григорьевич.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар